Talenti që zotëron është i jashtëzakonshëm, por personaliteti i vështirë ka bërë që të mos shpërthejë akoma. Schalke 04 e cilësoi si një yll dhe ishte e gatshme që ti vendoste klauzolën e famshme 50 milionë euro. Por fill pas këtyre ‘lavdratave’ karriera e tij mori për ters, me një kalvar huazimesh nga Gjermania në Austri, nga Austria në Holandë, aty ku sot vesh fanellën e Willem II.
Bëhet fjalë për Donis Avdijaj, djaloshi me origjinë kosovare i lindur në Osnabryk. Ai është pjesë e kombëtares së Kosovës dhe, në kohën kur telefonata nga Shqipëria mbërriti në celularin e tij, u përgjigj me një “jo, faleminderit”. Mendonte të luante me Gjermaninë, por kështu nuk ndodhi.
Pas Schalkes, që nuk besoi më te djaloshi, dyert e Sturm Graz u hapën për të, ndërsa më pas Roda dhe tani Willem II: 8 gola dhe 6 asiste në 17 ndeshje mes Eredivise dhe kupës kombëtaren kanë kthyer disi në nivelet e dikurshme fantazistin. Por, sipas asaj që shkruajnë mediet italiane dhe “Calciomercato”, interesimi i radhës nga ardhur nga një big e Serisë A, Juventusi.
Palët janë takuar në fund të vitit të shkuar, pra në dhjetor, teksa kanë diskutuar për mundësinë që ai të vishet bardhezi. Por, kujdes, jo me ekipin e Massimiliano Allegrit, por me Juventusin U-23, që stërvitet në Vinovo e jo Kontinasa.
Në qëllimet e trajnerit të bardhezinjve, që marrin pjesë në Serinë C, pra kategoria e tretë, gjeometritë e Avdijajt, që është vetëm 22 vjeç dhe ka ende rrugë për të bërë, janë të rëndësishme. Kontrata e tij skadon verën që do të vijë, ndaj edhe mund të transferohet me parametra zero. Avdijaj me Kosovën ka luajtur gjashtë ndeshje dhe shënuar dy gola.
