E pabesueshme ajo që ka bërë një klub amator në Irlandë. Ata kanë shpikur vdekjen e një prej futbollistëve të tyre me qëllim për të anuluar një ndeshje futbolli. Bëhet fjalë për ekipin Ballybrack FC, me bazë në Dublin, i cili njoftoi vdekjen e Fernando Nuno La-Fuenta.
Klubi njoftoi se ai kishte vdekur në një aksident, kur po kthehej në shtëpi pas stërvitjes. Këtë e ka pohuar edhe presidenti i Ligës kur ka thënë: “Ne morëm një telefonatë ku na thuhej se atyre u kishte vdekur një lojtar dhe se ata kishin nevojë që të shtynin ndeshjen. Ne kontaktuam dhe familjen, por nuk na u përgjigjën. Ndeshjet u luajtën duke mbajtur një minutë heshtje dhe me shirit të zi në krahë”.
Ndërsa vetë lojtari ka folur për “RTE Radio 1” ku është shprehur: “Dje kam ardhur në shtëpinë time, pasi kam mbaruar stërvitjen me qëllimin për të luajtur me video-game. Papritur, unë marr një telefonatë ku më thoshin se isha bërë i famshëm, kështu që vura re se më kishin shpallur të vdekur”. E quajta si një shaka pasi asnjë nga familjarët e mi nuk ishte i mërzitur. Gruaja ime e dinte që isha gjallë, kështu që mora edhe mamanë dhe i thashë që jam mirë”.
Takimi i Ballybracks kundër Arklow Town të shtunën u anulua, ndërsa në takimet tjera të ligës u mbajt një minutë heshtje. Megjithatë, tani ky klub ka kërkuar falje për trillimin e vdekjes së lojtarit.
