Ish-kryeministri Sali Berisha gjatë konferencës së përjavshme me gazetarët ka paralajmëruar protesta të fuqishme. Ai ka thënë se pasi të mbarojnë analizën e zgjedhjeve që lamë pas më 14 Maj, ku opozita arriti të fitonte vetëm 7 bashki, ish-kryeministri tha se do të ndërmarrin protesta të fuqishmne për të rikthyer votën e lirë.
Sa i përket analizës brenda Partisë Demokratike, Berisha kërkoi durim dhe kohë nga qytetarët, pasi ende janë duke mbledhur prova të cilat sipas tij vërtetojnë masakrën zgjedhore.
“Analiza në PD nuk ka filluar sepse siç po konstatoni, ne jemi çdo ditë në analizë të procesit elektoral. Jo çdo gjë është në duart tona. Nuk është në duart tona, materialet që na duhen, janë në duart e institucioneve të shkatërrimit të zgjedhjeve, janë në duar të afateve të gjykatave. Janë një seri procesesh që kërkojnë durim dhe kohë.
Por ne do i shkojmë gjer në fund. Ne sot ju informuam se kemi paraqitur me video se si në Elbasan, në të paktën 70 përqind të qendrave, operatori ka shkatërruar votimin. Me video. Ky është rezultati kur e bën komisionin 7 me 0, kur voton fëmija 10 vjeç. Me të mbaruar kjo analizë që e kemi detyrim absolut, përndryshe ne bëhemi bashkëfajtorë në farsën elektorale, ne legjitimojmë farsën elektorale. Ne nuk e bëjmë kurrë, nuk pajtohemi. Në mbyllje të kësaj, do jetë analiza. Me kaq seriozitet do bëjmë edhe analizën në PD dhe do ndërmarrim protestat e fuqishme për rikthimin e votës së lire”, tha Berisha.
