Kryetari i Partisë Demokratike, Sali Berisha, ka bërë një denoncim publik në rrjetet sociale, ku pretendon se Ministri i Drejtësisë, Ulsi Manja, ka zhvilluar një takim sekret në burg me Erion Veliajn.
Sipas Berishës, denoncimi vjen nga një punonjës i burgut të Durrësit, ku Veliaj po mbahet i izoluar prej dy javësh. Në mesazhin e publikuar, thuhet se Manja i ka krijuar kryebashkiakut të pezulluar të gjitha lehtësirat, përfshirë përdorimin e telefonit dhe takime me administratën e Bashkisë.
“Uluziu takim sekret në burg me Lali Vjedhësin! Ka urdhëruar t’i lejohet telefoni, të mos i ndalohen takimet,” shkruan Berisha në postimin e tij, duke publikuar edhe mesazhin e qytetarit dixhital.
Punonjësi anonim pretendon se Veliaj komunikon vazhdimisht me avokatët e tij dhe mediat pranë inceneratorëve.
Ndërkohë, nga Ministria e Drejtësisë nuk ka ende një reagim zyrtar lidhur me këtë denoncim.
