Virozat e stinës kanë rritur fluksin e vizitave në qendrat shëndetësore… Temperatura e lartë diarre të vjella janë simptomat kryesore që shoqërojnë ndërsa bluzat e bardha apelojnë për kujdes.
Mjekja Sonila Brati thotë se pjesa më e madhe pas vizitës rikthehen për t’u trajtuar në shtëpi.
“Ka një shtim të rasteve dhe të sëmundshmërisë këto ditë dhe shtim të virozëve. Përgjithësisht ato që predominojnë janë infeksionet e rrugëve të sipërme respiratore, rastet me diarre dhe të vjella janë të shtuara goxha, ku tek ne vijnë dhe të rritur dhe që zgjasin 3-4 ditë. Në raste të caktuara për shkak të komplikacioneve, mund të përfundojnë deri në 7 ditë”.
Doktoresha e vë theksin te vaksina kundër gripit e cila ashtu sic do vit ka nisur jo vetëm për të rriturit por dhe fëmijët. Përveç saj rekomandon edhe shmangien e vendeve të mbipopulluara.
“Vaksina e gripit ka filluar që nga fillimi i tetorit aplikimi tek qendrat shëndetësore. Prioritet janë moshat e treta, qoftë ata që janë me probleme të diabetit, hipertensionit, apo probleme pulmunare. Por pa diskutim edhe për fëmijët, ku është një vaksinë, e cila bëhet me një dozë dhe efektet anësore janë pothuajse minimale”.
Sa i përket situatës me covid 19 mjekja thotë se ka rënë numri i të infektuarve në krahasim me një muaj më parë. /Oranews
