I ati i 17-vjeçarit të plagosur ditën e djeshme gjatë sherri në Sarandë ka dhënë detaje për ngjarjen dhe ka treguar për gjendjen shëndetësore të të birit. Ai shprehet se 17-vjeçari prej ditës së djeshme po merr ndihmë mjekësore në Spitalin Rajonal të Vlorës.
Gjithashtu gjendja e tij shëndetësore është jashtë rrezikut për jetën, pasi thika nuk ka prekur organet jetësore. Po ashtu babai i të plagosurit rrëfen se konflikti ka nisur më herët më 22 mars, kur djali i tij është goditur disa herë me levë nga të njëjtët persona. Por nga frika e kërcënimeve 17-vjeçari u kishte thënë familjarëve dhe policisë se ishte rrëzuar nga shkallët.
Sipas babait të 17-vjeçarit ditën e djeshme më 27 mars djali i tij është sulmuar sërish nga të njëjtët persona, duke u goditur kësaj here me thikë. Gjithashtu babai i 17-vjeçarit kërkon që të arrestohen të gjithë personat e përfshirë në këtë ngjarje të rëndë.
