Pas tre vitesh në krye të ekipit të vajzave të Skënderbeut në volejboll, trajneri Orlando Koja ka zyrtarizuar largimin e tij. Dorëheqja erdhi menjëherë pas humbjes 3-0 në serinë finale ndaj Tiranës, që i dorëzoi titullin kampion skuadrës bardheblu.
Në deklaratën e tij për mediat, Koja shprehu mirënjohje dhe krenari për periudhën e kaluar me skuadrën korçare:
“E përfundoj këtë eksperiencë me krenari dhe mirënjohje. Kanë qenë tre vite intensive, të përjetuara me pasion dhe profesionalizëm. Falënderoj lojtaret, stafin, drejtuesit e Bashkisë Korçë, gjithë punonjësit e Pallatit të Sportit dhe mbi të gjitha tifozët e mrekullueshëm korçarë për mbështetjen e madhe dhe besimin e vazhdueshëm.”
Gjatë drejtimit të tij, skuadra e Skënderbeut përjetoi një periudhë të artë, duke regjistruar një bilanc të pasur trofesh në Kampionat Kombëtar, Kupa të Shqipërisë, Trofe “Liga Gjergj Kastrioti”, Kupë Pavarësie dhe Kupa Federata.
Ky sukses e rendit Skënderbeun si një prej ekipeve më të suksesshme të volejbollit shqiptar në vitet e fundit. Largimi i Kojas shënon fundin e një cikli të suksesshëm, ndërsa pritet të shihet cili do të jetë drejtimi i ardhshëm për të dhe për klubin korçar.
