Trajneri i Kombëtares shqiptare, Gianni De Biasi thekson se lojtarët e tij janë tërësisht të demotivuar pas humbjes së ndeshjes miqësore me Luksemburgun, paraqitje të cilën e kanë shfaqur që pas“ Evropianit 2016”. Sipas tij, mungesa e motivimit në grupin e lojtarëve ishte shkaku që kuqezinjtë u mposhtën përballë modestëve të Luksemburgut.
“Një humbje që peshon shumë ndaj një skuadre që ka më pak cilësi se ne, por me ndryshimin që ka më shumë dëshirë se ne për të luftuar, për të kërkuar rezultat, karakteristika që ne i kishim për dy vite e gjysmë deri në Evropian. Pas Evropianit, skuadra nuk gjeti atë dëshirë për të luftuar dhe për të arritur objektivat.”
I pyetur se përse nuk mundet ta motivojë skuadrën ashtu si para dhe në Evropian trajneri e ka një përgjigje: “Këtë skuadër, një trajner që erdhi nga Italia, e bëri të mendonte që ëndrrat ishin të mundura, e bindi që mund të fluturonte, aq sa fluturoi në Evropian. Mendoj se sot kjo skuadër duhet të gjejë brenda vetes, jo te dikush këtë motivim, se janë të rritur. E kuptoj që janë disa që nuk luajnë shumë, nuk bëjnë ndeshje. Por brenda grupit duhet gjetur forca në mënyra të ndryshme, duke filluar nga e diela në Izrael”, foli De Biasi për SuperSport.
