Në nderim të gjyqtarit Astrit Kalaja, i cili humbi jetën tragjikisht gjatë ushtrimit të detyrës, Gjykata e Shkallës së Parë të Juridiksionit të Përgjithshëm në Tiranë ka vendosur pezullimin e seancave gjyqësore për datat 7 dhe 8 tetor 2025.
Sot u pezulluan 105 gjyqe penale dhe civile në këtë gjykatë, raporton gazetarja e Top Channel, Anila Hoxha.
Deklarata:
Për shkak të pjesëmarrjes në homazhet, që do të zhvillohen në nderim të kolegut tonë të paharruar z.Astrit Kalaja, i vrarë ditën e djeshme, në krye të detyrës, gjyqtarët e Gjykatës së Shkallës së Parë të Juridiksionit të Përgjithshëm Tiranë (dhomat civile dhe penale) nuk do të jenë në gjendje të zhvillojnë gjykimet e planifikuara për datat 7 dhe 8 Tetor 2025, përveç gjykimeve me karakter urgjent (masa sigurimi, urdhëra të menjëhershëm mbrojtjeje…).
Ju faleminderit për mirëkuptimin!
Mbledhja e gjyqtarëve të Gjykatës së Shkallës së Parë të Juridiksionit të Përgjithshëm Tiranë.
Tiranë, datë 7 Tetor 2025
