Zbardhen akuzat që rëndojnë ndaj djalit të çiftit në Konispol, i cili hodhi nga shkallët babain, duke i shkaktuar vdekjen.
Ky i fundit sapo kishte vrarë me sëpatë bashkëshorten e tij. Policia Vendore e Vlorës sqaron se ndaj Klementin Islamajt rëndon akuza “Vrasja e kryer në gjendje të tronditjes së fortë psikike”.
Drejtoria Vendore e Policisë Vlorë
Në vijim të veprimeve procedurale të kryera për ngjarjen e ndodhur ditën e djeshme, në fshatin Shals, Konispol, ku shtetasi H. I., 69 vjeç, në banesë, dyshohet se goditi me sëpatë, në kokë, për motive të dobëta, bashkëshorten e tij, shtetasen Sh. I., 67 vjeçe, e cila si pasojë humbi jetën, Seksioni për Hetimin e Krimeve ndaj Personit arrestoi në flagrancë djalin e tyre, shtetasin K. I., 41 vjeç, për veprën penale “Vrasja e kryer në gjendje të tronditjes së fortë psikike”. Shtetasi K. I. dyshohet se pasi ka parë nënën e tij të pajetë, është konfliktuar fizikisht me babanë e tij, e ka shtyrë atë nga shkallët e banesës dhe si pasojë e dëmtimeve, 69-vjeçari ka humbur jetën.
