Villarreal zhvilloi një ndeshje fantastike përballë Real Madridit, ku në fund arriti të marrë një barazim me shumë vlerë 2-2. Ajo që ra më shumë në sy ishte fakti se të dy golat për vendasit u shënuan nga i njëjti lojtarë, Santi Cazorla. Vetëm pak kohë më parë futbollistit spanjoll nuk iu dha më shpresë se do të mund të luante futboll, për shkak të një dëmtimi të rëndë.
Por Cazorla edhe pse ishte një problem serioz, nuk hoqi dorë dhe pas shumë trajnimesh arriti të rikthehej në fushën e blertë dhe tashmë luan me Villarreal duke u kthyer edhe në hero. Pak kohë më parë ai tregoi vetë historinë e trishtë të dëmtimit, e cila kishte ardhur edhe për shkak të neglizhencës së mjekëve.
Në kyçin e këmbës kishte bakterie që po i hanin mishin kohë pas kohe, por askush nuk po e gjente dot se ku ndodhen këto bakterie. Ai tregon se janë dashur të bëhen më shumë se 3-4 operacione, vetëm për të gjetur bakteriet, ndërkohë që kocka ishte zbutur dhe ishte bërë si plastelinë. Gjithë kohës, Cazorla falënderon Arsen Wengerin, duke qenë se i rinovonte kontratën atë kohë, kur ishte pjesë e Arsenalit.
Megjithatë, pas shumë vështirësive dhe operacioneve të shumta, Cazorla arriti të triumfonte ndaj këtij dëmtimi dhe vitin e kaluar, u rikthye në fushë duke dalë nga një dhomë xhami, e mbushur me tym dhe duke u shfaqur me magji, falë një ‘magjistari’ spanjoll. Ajo që bën më shumë përshtypje, lidhet sërish me kyçin e këmbës së Cazorlës.
Duket qartë që ai ka një tatuazh pa kuptim në kyç, por në fakt nuk është dëshira e tij që të kishte atë tatuazh. Duke qenë se mishi i këmbës i ishte infektuar keq, nuk mund të dilte mish i ri dhe në këtë mënyrë, i duhej që të hiqte një copë nga pjesa tjetër e trupit, për ta vendosur aty. Ai mendoi ta hiqte nga krahu, aty ku ka edhe një tatuazh dhe ta vendoste në këmbë, duke e ndarë në këtë mënyrë tatuazhin në dy pjesë, për të plotësuar trupin e tij.
