Pablo Escobar, i njohur ndryshe si baroni më i madh i drogës në histori, e filloi karrierën e tij kriminale në moshën 14-vjeçare, duke vjedhur gurët e varrit nga varrezat e qytetit dhe duke i shitur ato.
Në moshën 16-vjeçare filloi të pinte marijuanë dhe të vidhte makina, 17-vjeç filloi të merrej me shpërndarjen e marijuanës, ndërsa 18-vjeç kreu vrasjen e parë.
Përpos trafikimit të kokainës, Pablo Escobar ishte dhe një kriminel i paskrupullt dhe i pamëshirshëm. Duke përdorur moton “Argjendin ose plumbin”, Escobar u jepte ryshfete të majme policëve dhe gjykatësve, që pranonin të bashkëpunonin me të.
Pablo Escobar ishte mbreti i kokainës dhe lideri i një prej organizatave kriminale më të fuqishme në botë. Gjatë zgjerimit të pushtetit të tij në vitet 1980, ai kontrollonte një perandori të madhe të drogës dhe një seri vrasjesh që mbulonin globin. Pablo Escobar ka vrarë me dorën e tij mbi 100 persona, dhe është përgjegjës për vrasjen e mijëra të tjerëve dhe plagosjen e disa mijëra të tjerëve.
Eskobar u vra më 2 dhjetor 1993. Dhe sot e kësaj dite, ai nderohet si hero popullor në getot e Kolumbisë. Fotot në fjalë tregojnë rezidencën e shkatërruar të kriminelit më të pasur në histori, Pablo Escobar.
“Mbreti i Kokainës” bleu 81 mijë metra katrorë në Guatape të Kolumbisë, pasi lindi vajza e tij Manuela në vitin 1984, dhe i vuri tokës po të njëjtin emër, në nder të vajzës.
Ndërtesa ishte e përbërë nga mure me dy shtresa, për fshehjen e parave dhe kokainës. Në brendësi të saj ndodhej një disko private, një pishinë, një shtëpi për mysafirët, një pistë avioni, fusha tenisi, një fushë futbolli dhe një kopsht zoologjik.
Por grupi kundërshtar Los Pepes, i financuar nga rivalët e kartelit Kali, shkatërroi pronën e Escobar në vitin 1993, duke shpërthyer 200 kg tritol.
