Gardiani i kombëtares gjermane, Manuel Neuer me shumë mundësi nuk do të jetë i gatshëm për finalet e Botërorit. Është vetë portieri gjerman që ka konfirmuar se nuk mendon se do të jetë në formën më të mirë për të udhëtuar drejt Rusisë me ekipin.
“Nuk mund të them në këtë moment që unë do të jem në finalet e Kupës së Botës. Ndihem mirë për të gjitha gjërat që po bëj, por nuk besoj se është bindëse që të shkoj në këtë kampionat pa luajtur asnjë ndeshje”, tha Neuer. Kapiteni i Gjermanisë është në kontakt të vazhdueshëm me trajnerin Joachim Low, i cili njeh me detaje gjendjen e portierit.
Por nga ana tjetër trajneri i Bayer Munich, Jup Heynckes është shprehur se Neuer nuk është i gatshëm që të zbresë në fushë, për këtë arsye ai ka vendosur që të mos e aktivizojë në dy ndeshjet e radhës me Stutgartin dhe në finalen e Kupës më 19 maj me Frankfurtin.
“Manuel Neuer nuk do të luajë të shtunën kundër Shtutgartit, në javën e fundit të Bundesligës, madje as në finalen e Kupës së Gjermanisë, më 19 maj.”Një lajm i keq për tifozët e “Pancerave” dhe veçanërisht për trajnerin Joakim Low, që shpreson deri në ditën e fundit për riaftësimin e plotë të “gardianit”, kampion bote me Gjermaninë në “Brazil 2014”.
Pas Kupës së Gjermanisë mbeten vetëm 2 ndeshje të tjera që Neuer të mund të testohet, miqësorja me Austrinë në 2 qershor në Klagenfurt dhe 6 ditë më pas në Leverkusen kundër Arabisë Saudite.
“Sesionet stërvitore që kam zhvilluar kanë qenë të mira dhe unë duhet të marr një vendim korrekt për veten, për skuadrën, për Gjermaninë”, deklaroi Manuel Neuer. “Unë kërkoj të arrij më të mirën dhe po synoj që të arrij formën më të mirë të mundshme. Përtej kësaj kam bërë hapa pozitivë dhe synoj të vazhdoj kështu deri në fund”, deklaroi kapiteni i Gjermanisë.
