Helmimi i ish-spiunit rus/Tremben anglezët, “braktisin” Botërorin

Përplasjet mes Britanisë së Madhe dhe Rusisë pas helmimit të kolonelit Sergej Skripal, ish-agjent i KGB, i cili është në luftë me jetën në spital bashkë me të bijën në qytetin anglez Salisbury. Britanikët pretendojnë se në këtë ngjarje ka dorë pala ruse dhe për këtë arsye po e mendojnë seriozisht pjesëmarrjen e kombëtares “Tre Luanët” në Kupën e Botës, pasi vend organizator do të jetë Rusia.

Momentalisht flitet që kombëtarja e futbollit do të marrë pjesë por e shoqëruar nga një delegacion, i cili do të kujdeset për sigurinë e tyre. Nga ana tjetër tifozëve u është bërë thirrje që të mos udhëtojnë drejt Rusisë, pasi rreziku që ata të dhunohen nga grupet huligane janë të mëdha. Kjo pasi një përplasje mes tyre ka ndodhur edhe në Marsejë të Francës në Euro 2016, ku disa tifozë u dëmtuan rëndë dhe kanë ngelur me pasoja nga përplasja e dhunshme.

Ndërkohë, trajneri i Anglisë, Gareth Southgate, deklaroi: “Ne e japim për të sigurt se të gjithë duan të luajnë në Kupën e Botës, por nuk është kështu. Detyra ime është të përgatis ekipin, të grumbulloj futbollistët dhe të mendoj për atë që ndodh në fushën e lojës. Personalisht mendoj se duhet të marrim pjesë, por nuk jam unë ai që vendos. E vetmja gjë që ka rëndësi është siguria e skuadrës tonë dhe tifozëve që do të na shoqërojnë. Secili prej lojtarëve që nuk ka siguri për të ardhur në Rusi, duhet të ma thotë dhe unë do të respektoj vendimin e tij, pa marrë asnjë masë.”