Është vënë re se kohët e fundit shqiptarët kanë një tendencë për të pushuar jashtë shtetit, por ndërkohë vendi ynë na ofron mundësi shumë të mira në kosto të ulëta. Shqipëria historikisht është njohur si një prej vendeve më të bukura të Ballkanit, me bukuritë e shumta natyrore që ofron. Por përveç bukurisë që këto vende paraqesin, ato mbartin me vete nga një histori të fortë që i bën edhe më tërheqëse. Mes shumë perlave që ofron bregdeti apo mali, dhe që shumë kush i ka vizituar, ne kemi përzgjedhur disa më të veçantat, që flasin për një larmi komplekse historish dhe kulturash.
Ishulli i Sazanit
Ishulli i Sazanit është një nga ishujt më të bukur të vendit tonë, të cilin e bën edhe më të veçantë historia që ka, pasi ai mund të konsiderohet një “enigmë e pazbuluar”. Ishulli i Sazanit në Vlorë është ishulli i vetëm i banuar në Shqipëri. I hapur për turistët që më 1 maj, kjo perlë e vendit tonë do të mund të vizitohet nga shqiptarët, por edhe të huajt deri më 31 tetor.
Nëse e sheh nga afër këtë mrekulli të natyrës, me siguri do të mbetesh gojëhapur. Ai ka shërbyer si bazë ushtarake për një kohë shumë të gjatë dhe është shpallur “Zonë e Mbrojtur”.
Sot, aty qëndrojnë vetëm dy marinarë, të cilët kanë si detyrë të kontrollojnë aktivitetet e paligjshme mes Shqipërisë dhe Italisë. Ky ishull pritet të kthehet në një nga destinacionet e preferuara të turistëve, të cilët duan të “prekin” nga afër këtë vend të mahnitshëm që mbart një histori të rrallë.
Thethi
Parku Kombëtar i Thethi gjendet në Alpet Shqiptare, pranë Bjeshkëve të Namuna, 70 km nga Shkodra. Një monument natyror vërtet interesant është ujëvara e Grunasit. Ujërat e saj zbresin nga një lartësi prej 30 metër, në zemrën e Alpeve Shqiptare. Thethi ka pamjen e një pellgu 800 metra mbi nivelin e detit. Ai është i vendosur midis një kurore majash të thepisura, si, Radohima, Maja e Arapit, Maja e Alisë, që spikatin për bukuritë e rralla në të gjithë Alpet. Thethi shquhet për kontrastet e relievit, ujëvarave, bimësisë së dendur, livadheve e sidomos ngjyrave.
Kanionet e Osumit
Kanionet e Osumit, i njohur ndryshe edhe si ¨Kanionet i Skraparit¨, është kanioni më i madh lumor në Shqipëri. Ai gjendet në rajonin jugor të Republikës së Shqipërisë, përkatësisht në Qarkun e Beratit, Rrethi i Skraparit. Pamjet mbresëlënëse të natyrës në këtë kanion e bëjnë atë një nga më tërheqësit në rajonin e Ballkanit. Kanioni është krijuar prej forcave gërryese dhe tretëse të lumit Osum, të ushtruara në masën shkëmbore gëlqerore të strukturës antiklinale të Çorovodës, dhe është rreth 13 km i gjatë, nga 4 deri në 35 m i gjerë, i thellë deri në 70-80 m, me shpate vertikale. Koha e formësimit të tij mendohet të jetë 2 deri në 3 milionë vite më parë. Kur udhëton në brendësi të tij mahnitesh nga bukuria befasuese, por edhe nga disa përshtypje të çuditshme dhe të pabesueshme që të krijohen: copërat e qiellit së bashku me pjesë të mureve vertikale të gëlqerorëve gri dhe të bimësisë të blertë pasqyrohen në pellgjet e shumta të lumit, duke krijuar kështu një përzierje ngjyrash dhe formash të përmbysura, që me fluiditetin e tyre të hutojnë, të çorientojnë dhe të zhytin në një botë krejt tjetër, ireale, por që të ngjallin ndjesi të ëmbla, nga të cilat nuk ke dëshirë të dalësh. Kjo nuk është e vetmia mrekulli e këtij kanioni: në disa sektorë të tij shfaqen ujëvara të mëdha me bukuri befasuese, sidomos në ditët me diell, rrezet e të cilit zbërthehen nga piklat e ujit, duke formuar ylbere, që fillojnë nga qielli, vazhdojnë në shpatet e kanionit, nga ku pasqyrohen në pellgjet e ujit dhe në shtratin e lumit.
Liqeni i Pogradecit
Liqeni i Pogradecit (Ohrit), shtrihet në jug-lindje të vendit tonë dhe përfaqëson një pellg ujor me origjinë tektonike. Ky liqen është një nga liqenet më të bukur në botë dhe më i bukuri i të gjithë liqeneve të gadishullit të Ballkanit. Në ujët e tij të kulluar mund të shquhen sendet në një thellësi prej rreth 20 metrash. Qartësia e madhe i detyrohet zhvillimit të paktë të mikroorganizmave, përbërjes së fundit të ujit dhe thellësisë. Nga larg, ujët e liqenit duket i shumëngjyrshëm.
Forma vezake, brigjet e rregullta dhe me dy gadishuj të vegjël (njëri në bregun lindor, gadishulli shkëmbor i Ohrit dhe tjetri në bregun perëndimor, gadishulli i Linit), malet që e rrethojnë (nga perëndimi: malet e Mokrës, që janë pjesërisht të mbuluara me drurë dhe zbresin ëmbël dhe nga lindja, malet e zhveshura – Galicica (Maqedoni), Mali i Thatë që bie thikë mbi të, fushat që gjenden në veri, si fusha e Strugës dhe në jug ajo c Starovës, që lë gjitha këto i japin liqenit një bukuri lë jashtëzakonshme. (Tirana Today)
