Ramush Haradinaj ka bërë thirrje nga Franca që vendi të shkojë në zgjedhje, si një zgjidhje për riparimin e gjendjes së rëndë që ka “paralizuar” Kosovën.
“Mbajtja e gjendjes ekzistuese po bëhet e rëndë dhe e vështirë për institucionet dhe për vendin, sidomos për qytetarin. Duhet t’ia kthejmë vendimin qytetarit, pra sovranit. Në këtë situatë, kjo është legjitime dhe shprehje e një pjekurie politike, e një vetëdije të lartë. Nuk bën të testohet deri në pafundësi një gjendje e tillë. Mënyra më e mirë për t’u riparuar kjo gjendje që e ka rënduar Kosovën është për t’ia kthyer vendimin sovranit. Kjo besoj se do të ishte e mirë për gjithë spektrin politik dhe për qytetarët”, tha Haradinaj, në një intervistë për gazetën “Epoka e Re”.
Kreu i AAK-së po mbahet prej disa muajsh në Francë, teksa po pret vendimin e Gjykatës së Colmarit, më 27 prill, pas ndalimit në bazë të një fletarresti serb.
Gjithashtu, Haradinaj u shpreh i bindur se gjykata do e refuzojë kërkesën e Serbisë për ekstradim dhe se do ta lirojë atë.
