Kryeministri Haradinaj duket se është më i vendosur se kurrë lidhur me moslejimin e ndryshimit të kufijve të territorit të Kosovës.
Këtë ai e përforcoi në një postim në Facebook, në kuadër të 120-vjetorit të themelimit të Lidhjes së Pejës, ku ka marrë pjesë në homazhe tek shtatorja e atdhetarit Haxhi Zeka.
Haradinaj dha një mesazh të qartë për popullin shqiptar, teksa theksoi sërish se shqiptarët asnjëherë nuk japin nga toka dhe e drejta e tyre.
POSTIMI I PLOTË:
Nderim te shtatorja dhe kulla e atdhetarit, luftëtarit dhe udhëheqësit të shquar të Lëvizjes Kombëtare, Haxhi Zeka, në shënim të 120-vjetorit të themelimit të Lidhjes së Pejës, e cila definoi të drejtën shqiptare.
Besëlidhja, si nyjë unike kombëtare, pati jehonë të madhe në unifikimin dhe mbajti gjallë idenë e lirisë së shqiptarëve. Rruga jonë ishte e gjatë dhe e vështirë, por falë përpjekjeve të pararendësve tanë, sot jemi afër realizimit të plotë të idealit të tyre.
Populli shqiptar është mik për mikun dhe di ta respektojë edhe armikun, por asnjëherë më nuk jep nga toka dhe e drejta e tij.
