Kryeministri i Kosovës Ramush Haradinaj, është i pranishëm për një vizitë në qytetin shqiptar të Vlorës, ku është pritur nga kryebashkiaku Dritan Leli dhe ministri për Diasporën Pandeli Majko. Por, Haradinaj gjatë kësaj vizite do të qëndrojë edhe në Monumentin e Pavarësisë si dhe do të vendosë kurora lulesh në varrin e Ismail Qemalit. Kjo vizitë vjen në një kohë kur në Kosovë po diskutohet korrigjimi i kufijve, temë e ngritur nga Presidenti Hashim Thaçi. I pyetur nga gazetarët për deklaratat e Thaçit, Haradinaj u shpreh se është kundër dhe kufijtë janë vendosur me luftë e nuk ndryshohen me fjalë.
Pyetje: A jeni pro deklaratave të Thaçit?
Haradinaj: Ajo që jam pro është që në 1 Janar të heqim doganën mes Kosovës dhe Shqipërisë.
Pyetje: Çfarë hapash keni më tej?
Haradinaj: Do heqim doganën, me qëllim po e devijoj pyetjen tuaj, ajo është një retorikë politike. Beogradi bën retorikë, Prishtina bën një kundërpërgjigje, ju e dini që kufijtë nuk lëvizen me fjalë.
Pyetje: A e konsideroni referendumin një opsion?
Haradinaj: Kufijtë janë vendosur.
Kundër ndryshimit të kufijve është shprehur edhe ish-Kryeministri shqiptar Sali Berisha, i cili u përplas në distancë në rrjetet sociale me Presidentin kosovar Hashim Thaçi.
Ky i fundit vazhdon të insistojë në idenë e tij për korrigjimin e kufijve përmes një marrëveshje dhe jo në ndryshimin e tyre. Një ditë më parë, Thaçi deklaroi se në Shtator do të diskutohet për bashkimin e Luginës së Preshevës me Kosovën, përmes një referendumi.
