Autoriteti Kombëtar për Sigurinë Kibernetike (AKSK) ka reaguar pas sulmit kibernetik të kryer ndaj faqes online të Bashkisë së Tiranës, duke informuar se është ngritur një grup pune që po verifikon pikat e hyrjes së sulmit dhe po merren masat për garantimin e sigurisë.
Sipas AKSK-së, incidenti ka ndikuar në funksionimin normal të disa shërbimeve dhe aplikacioneve të Bashkisë së Tiranës. Autoriteti tha se grupi i ngritur po punon në bashkëpunim me Policinë e Shtetit dhe me stafin teknik të bashkisë për të analizuar dëmet, kufizuar përhapjen e sulmit dhe rikthyer shërbimet në funksion sa më shpejt.
Sulmi është marrë përsipër nga rrjeti iranian i hakerëve Homeland Justice, të cilët pretendojnë se jo vetëm kanë rrëzuar faqen, por edhe kanë nxjerrë të dhëna dhe kanë fshirë serverat.
AKSK ka theksuar se mbetet e angazhuar për të garantuar sigurinë kibernetike dhe integritetin e sistemeve të teknologjisë së informacionit në Shqipëri. Autoriteti u ka bërë thirrje qytetarëve dhe mediave që të referohen vetëm te komunikimet zyrtare të AKSK për informacion të saktë mbi situatën.
Autoriteti Kombëtar për Sigurinë Kibernetike:
Autoriteti Kombëtar për Sigurinë Kibernetike (AKSK) informon opinionin publik se ditën e sotme është konstatuar një incident kibernetik që ka prekur disa prej infrastrukturave dhe sistemeve të informacionit të Bashkisë Tiranë.
Nga vlerësimi paraprak, incidenti ka ndikuar në funksionimin normal të disa shërbimeve dhe aplikacioneve që administrohen nga kjo bashki.
Menjëherë pas marrjes së sinjalizimit për rastin, AKSK në bashkëpunim me Policinë e Shtetit ka ndërmarrë të gjitha hapat e parashikuara nga procedurat operative të reagimit ndaj incidenteve, duke ngritur një grup të dedikuar pune, i përbërë nga ekspertë të sigurisë kibernetike. Ky grup ka nisur menjëherë punën në terren në bashkëpunim të ngushtë me stafin teknik të Bashkisë Tiranë për të:
Kryer analizën fillestare të komprometimit të infrastrukturës dhe identifikimin e pikave të hyrjes së sulmit;
Izoluar dhe kufizuar përhapjen e ndikimit në sistemet e tjera të ndërlidhura;
Ndërmarrë masat e para për rikthimin e funksionimit të sistemeve të goditura;
Hartuar rekomandimet e para për përmirësimin e sigurisë dhe forcimin e mekanizmave mbrojtës në infrastrukturat përkatëse.
Aktualisht, punonjësit e AKSK-së janë në terren dhe në koordinim të plotë me autoritetet vendore, Policinë e Shtetit, si edhe AKSHI-n për analizën e malware-t si edhe me institucionet përgjegjëse, për të siguruar një rikthim sa më të shpejtë dhe të sigurt të sistemeve në funksionalitet të plotë.
Autoriteti Kombëtar për Sigurinë Kibernetike dënon çdo akt që cënon infrastrukturat kritike të informacionit dhe mbetet i përkushtuar në garantimin e integritetit, konfidencialitetit dhe disponueshmërisë së sistemeve të teknologjisë së informacionit në Republikën e Shqipërisë.
Në vijim do të ofrojmë përditësime të mëtejshme mbi ecurinë e hetimeve dhe masat e ndërmarra, në përputhje me zhvillimet dhe informacionin e konfirmuar teknikisht.
Për çdo informacion zyrtar, qytetarët dhe mediat ftohen të referohen vetëm në kanalet zyrtare të AKSK.
