Pas fitores së të birit në duelin historik, i ati i Khabib i ka nisur një mesazh Conor McGregor.
Pavarësisht përleshjeve që ndodhën në natën e duelit, por edhe më përpara, ku McGregor është treguar “i pamëshirshëm”, i ati i rusit nuk i mban mëri.
Abdulmanap Nurmagomedov ka thënë se e ka falur Conor për gjithçka që ka ndodhur në të shkuarën.
“E fal Conor McGregor për gjithçka në të shkuarën. Duhet të bëjmë një analizë të gjithçkaje që ka ndodhur dhe të marrim mësime”, shkruan ndër të tjera i ati i kampionit.
Khabib u hodh nga kafazi pak momente pas fitores dhe sulmoi trajnerin e McGregor, Dillion Danis. Pak sekonda më pas, tre persona nga ekipi i Khabib u arrestuan pasi sulmuan kundërshtarin e tij.
McGregor vendosi të mos akuzojë asnjë nga sulmuesit. Ndërkohë, i ati i Khabib, Adbulmanap Nurmagomedov foli për televizionin rus Ren TV, teksa tregoi se ishte shumë i nxehur me sjelljen e të birit.
“E paralajmërova, do jem shumë i ashpër me të. Për mua, disiplina është e para. Ti bën çfarë të duash brenda kafazit, por jashtë tij është një anë civilizimi, ku ka fëmijë, gra dhe të huaj”, tha ai./ Përshtati TIRANA TODAY
