Muaji gusht që po lëmë pas solli një tragjedi të vërtetë në rrethin e Gramshit duke shënuar shifra rekord të vatrave të zjarrit që përfshinë masivisht pyje, blegtori dhe banesa duke shkaktuar dëme të pallogaritshme për banorët e zonës. Zona më e goditur ishte Njësia Administrative Skënderbegas, ku flakët e pamëshirshme shkatërruan gjithçka në rrugën e tyre.
Sipas të dhënave zyrtare, 212 krerë të imta, 9 gjedhë, 6 njëdhundrakë dhe 60 koshere me bletë u dogjën dhe më pas u groposën nga ekipet e Shërbimit Veterinar, të cilët janë angazhuar në terren për monitorimin dhe menaxhimin e situatës.
Kujtim Çekrezi, koordinator i Shërbimit Veterinar pranë Bashkisë Gramsh, deklaroi se pas verifikimit dhe identifikimit në terren, ekipet e përbëra nga specialistë veterinarë kanë ndërhyrë për groposjen e kadavrave të kafshëve të ngordhura si pasojë e zjarreve.
“Situata ishte e rëndë. Kemi humbje të konsiderueshme në blegtori dhe bletari, ndërsa puna në terren vazhdon çdo ditë me 6 grupe të përbashkëta mes bashkisë dhe shërbimit veterinar”, theksoi Çekrezi.
Një tjetër fshat i goditur rëndë është Bletëza, ku dëmet në fermat blegtorale dhe bletaritë janë të konsiderueshme. Ndërkohë, hetimi dhe vlerësimi i dëmeve është ende në proces, dhe në ditët në vijim pritet publikimi i të dhënave përfundimtare për 7 fshatra të Bashkisë Gramsh, të cilat kanë pësuar pasoja të rënda nga flakët.
Përveç dëmeve në bujqësi dhe ekonomi familjare, mbi 40 banesa janë shkatërruar plotësisht, duke lënë dhjetëra familje në qiell të hapur, të pastreha dhe në pritje të ndihmës nga shteti.
Në një deklaratë të fundit, Kryeministri Edi Rama ka premtuar se do të nisë procesi i rindërtimit të banesave dhe dëmshpërblimi për familjet e prekura, me një vendim të posaçëm të qeverisë që pritet të miratohet në ditët në vijim.
Zjarret në shtatë fshatra të Gramshit gjatë muajit Gusht lanë pas jo vetëm tym dhe hir, por edhe dhimbje, pasiguri dhe sfida të mëdha për një numër jo të vogël familjesh.
