Presidenti i Guatemalës, Jimmy Morales ka urdhëruar ambasadën e vendit në Izrael që të zhvendoset në Jerusalem.
Lajmin e bëri të ditur vetë presidenti Morales, i cili deklaroi në një postim në Facebook se vendimi u mor pasi ai kishte folur me kryeministrin e Izraelit, Benjamin Netanjahu.
Javën e kaluar, Guatemala ishte një nga nëntë shtetet e vetme që votuan kundër një rezolute të OKB-së, që i bëri thirrje Amerikës që të kthejë njohjen e Jerusalemit si kryeqytetin e Izraelit, raporton Tirana Today.
Donald Trump kërcënoi të shkurtojë ndihmën ndaj shteteve që votuan kundër SHBA-së.
SHBA është një donator i rëndësishëm i ndihmës në Guatemalë, një vend i varfër në Amerikën Qendrore.
Të dielën, Morales tha se kishte udhëzuar autoritetet e Guatemalës të fillonin “bashkërendimin e nevojshëm përkatës” përpara se të lëviznin ambasadën nga Tel Avivi në Jerusalem. Ai tha gjithashtu se Guatemala kishte qenë një aleat i Izraelit për një kohë të gjatë.
Sovraniteti izraelit mbi Jerusalemin nuk është njohur ndërkombëtarisht dhe të gjitha vendet aktualisht mbajnë ambasadat e tyre në Tel Aviv. Megjithatë, Presidenti Trump i ka thënë departamentit të shtetit amerikan të fillojë punën për të lëvizur ambasadën amerikane. TIRANA TODAY
