Telenovela Ergys Kaçe ka pasur një fund të lumtur dhe më në fund mesfushori i kombëtares shqiptare arriti të largohet nga PAOK-u ku nuk kishte hapësirë për të luajtur. Ai është huazuar për 6 muaj tek Panathinaikos dhe në fund të sezonit ekipi kryeqytetas ka të drejtën e blerjes. Ishte parashikuar që mesfushori i talentuar të firmoste pak ditë më parë tek qipriotët e APOEL-it, por racizmi i tifozëve bëri që të anulohej gjithçka.
Panathinaikos bëri goditje të dyfishtë,pasi përveç Kaçes ka huazuar edhe Janis Mistakides. Pas mbylljes së këtij finalizimi trajneri i APOEL ka reaguar i dëshpëruar, kjo pasi ultrasit protestuan për të mos e lejuar kalimin për faktin se ishte shqiptar dhe se kishte postuar foto në të shkuarën me fanellën e UÇK-së.
Trajneri George Dionis, i cili e ka zbuluar shqiptarin te PAOK disa vite më parë duke i dhënë besim, ka reaguar në lidhje me situatën e krijuar. “Kaçe ishte zgjedhja ime e parë në merkato. Mendoj që kemi humbur një futbollist të shkëlqyer. Mbi të gjitha, unë jam grek dhe e dua vendlindjen time. Mirëpo, vendi im është aty ku është prej atyre që e kanë drejtuar ndër vite. Në gjykimin tim, Greqisë nuk i vjen asnjë rrezik nga Kaçe, por është në rrezik nga vetë grekët. Jemi treguar të pandershëm me një fëmijë”, ka deklaruar trajneri i APOEL-it.
