Ministri i Turizmit, Kulturës dhe Sportit, Blendi Gonxhja ka përfaqësuar Shqipërinë në Asamblenë e Përgjithshme të UN Tourism në Riad, ku dhe mbajti fjalën e tij si një ndër 31 folësit e përzgjedhur nga 160 vendet pjesëmarrëse.
Në fjalën e tij Gonxhja foli mbi punën për përmirësimin e përvojës së vizitorit dhe zgjatjen e sezonit turistik, diversifikimin e ofertës turistike përtej zonave bregdetare duke fuqizuar zonat rurale dhe komunitetet lokale. Po kështu, ai foli për miratimin e Standardeve Ndërkombëtare të Qëndrueshmërisë (GSTC) dhe krijimin e destinacioneve “inteligjente”, të përditësuara nga të dhëna në kohë reale për menaxhimin e fluksit të vizitorëve dhe mbrojtjen e burimeve.
“Vitin e kaluar, Shqipëria miratoi Strategjinë e Specializimit Inteligjent (S3) 2025–2030, e cila e identifikon Turizmin e Qëndrueshëm dhe të diversifikuar si një nga fushat prioritare të vendit për zhvillim dhe inovacion. Objektivi kryesor është përmirësimi i cilësisë së përvojës së vizitorit dhe zgjatja e sezonit turistik, si dhe zhvillimi i produkteve që lidhen me kulturën, natyrën, gastronominë, shëndetin dhe mirëqenien. Një tjetër qëllim kyç është diversifikimi i ofertës përtej asaj turistike përtej zonave bregdetare duke fuqizuar zonat rurale dhe komunitetet lokale. Turizmi trajtohet si një sektor ndërdisiplinor, ku teknologjia, kreativiteti dhe trashëgimia kulturore ndërveprojnë për të krijuar vlera të qëndrueshme. Korniza e zbatimit përfshin miratimin e “Standardeve Ndërkombëtare të Qëndrueshmërisë”(GSTC) dhe krijimin e destinacioneve “inteligjente”, të përditësuara nga të dhëna në kohë reale për menaxhimin e fluksit të vizitorëve dhe mbrojtjen e burimeve. Gjatë periudhës 2025-2027, janë planifikuar disa programe prioritare:
Pilotimi i 2-3 qendrave inteligjente kulturore dhe natyrore, me bileta të unifikuara dhe rrugë tematike;
Krijimi i një “Rrjeti Kombëtar të Agroturizmit dhe Gastronominë Lokale”;
Zhvillimi i iniciativave të turizmit shëndetësor dhe wellness;
Zbatimi i skemave për hotelet dhe DMO me standarde të gjelbra“, u shpreh ai
Sakaq, ministri e cilësoi turizmin si një sektor ndërdisiplinor, ku teknologjia, kreativiteti, aktivitetet dhe trashëgimia kulturore ndërveprojnë.
Ai u ndal dhe tek Inteligjenca Artificiale, duke u shprehur se mbështet kalimin nga “volumi i turizmit” në “turizmin cilësor” duke mundësuar menaxhimin e të dhënave, ruajtjen e trashëgimisë natyrore dhe kulturore, luftimin e informalitetit, zhvillimin ekonomik, duke gjeneruar rritjen dhe optimizimin e përgjithshëm të industrisë së turizmit.
Shërbimi i IA-së, Gonxhja u shpreh se ka bërë që Shqipëria të ndërtojë një themel të fortë në transformimin dixhital. Duke përmendur aksesin e qytetarëve në e-Albania për shërbime publike, ministri nuk la pa përmendur risinë e Shqipërisë, ministren e parë në botë e IA, Diella.
“Në këtë kontekst, Inteligjenca Artificiale mbështet kalimin nga “volumi i turizmit” në “vlerë të turizmit” duke mundësuar menaxhimin e të dhënave, ruajtjen e trashëgimisë natyrore dhe kulturore, luftimin e informalitetit, shërbimin e ekonomisë si dhe duke gjeneruar rritjen dhe optimizimin e përgjithshëm të industrisë së turizmit. Shqipëria tashmë ka ndërtuar një themel të fortë në transformimin dixhital. Qytetarët aksesojnë shërbimet publike përmes platformës e-Albania, e cila standardizon ofrimin e shërbimeve dhe transparencën në institucionet qeveritare. Kjo qasje dixhitale forcohet më tej nga Ministri i Shtetit për Inteligjencën Artificiale, Ministrja Diella, ministrja e parë në botë e Inteligjencës Artificiale, duke krijuar kornizën për integrimin teknologjik në të gjithë sektorët strategjikë, përfshirë turizmin”, tha ai.
Ministri Blendi Gonxhja foli gjithashtu për zhvillimin e kapaciteteve njerëzore, përmes programeve të trajnimit për profesionistë të pazëvendësueshëm të mikpritjes, artizanët si dhe punonjësit e kulturës, duke siguruar nga ana tjetër teknologjinë si mjet për të rritur cilësinë, efikasitetin dhe inovacionin brenda sektorit, duke digjitalizuar, automatizuar dhe kursyer.
“Një tjetër komponent i rëndësishëm i “Strategjisë së Shqipërisë” është zhvillimi i kapaciteteve njerëzore, përmes programeve të trajnimit për profesionistë të mikpritjes, artizanët si dhe punonjësit e kulturës; duke siguruar nga ana tjetër që teknologjia të përdoret si një mjet për të rritur cilësinë, efikasitetin dhe inovacionin brenda sektorit, duke digjitalizuar, automatizuar dhe kursyer”, u shpreh ai.
Në fund të fjalës së tij falenderoi Mbretërinë e Arabisë Saudite për mikpritjen e shkëlqyer, duke riafirmuar mbështetjen e vendit tonë për Deklaratën e Riad për të ardhmen e turizmit!
Ai shprehu mirënjohjen për Sekretarin e Përgjithshëm, Zurab Pololikashvili për kontributin dhe udhëheqjen e tij të çmuar, si dhe uroi Sekretaren e Përgjithshme të zgjedhur, Sheikha Al Nowais, në misionin e saj të ri!
“Falënderime të veçanta për Mbretërinë e Arabisë Saudite, për mikpritjen e shkëlqyer, duke riafirmuar mbështetjen tonë për “Deklaratën e Riad” për të ardhmen e turizmit!
Falënderojmë Sekretarin e Përgjithshëm, Zurab Pololikashvili për kontributin dhe udhëheqjen e tij të çmuar, mirëpresim Sekretarin e Përgjithshëm të zgjedhur, Sheikha Al Noëais, duke i uruar më të mirat në mision!
Dhe për të gjithë: Welcome in Albania – Ju Mirëpresim në Shqipëri!“, tha ai.
