Manchester United pësoi një humbje të thellë në ‘Anfield’ përballë Liverpool dhe tashmë ndodhen 19 pikë larg kryesuesve të Premier League dhe 11 larg zonës Champions. Një ndeshje fantastike nga të besuarit e Klopp, me një Shaqiri të papërmbajtshëm, i cili ndryshoi rrjedhën e lojës me dy golat e tij. Për këtë situatë ku ndodhet United, Jamie Carragher ishte shumë i qartë: Jose Mourinho duhet të largohet.
Analisti i Sky Sports tha se United do të përmirësohet vetëm me një ndryshim të menaxherit, me Mourinho që nuk ka çfarë të japë më në Old Trafford. “A është një ekip që është mjaft i mirë për të fituar ligën? Jo. A është një ekip që duhet të jetë i gjashti në ligë? Jo,” tha Carragher. “A është Mourinho duke marrë maksimumin nga lojtarët? Aspak, është shumë larg asaj që duhet të jetë dhe kjo mund të rregullohet vetëm me një ndryshim të madh në zonën e nxehtë.”
Ekipi i ekspertëve të ‘Sportsmail’ zbulon nëse ata janë dakord me Carragher, duke iu përgjigjur pyetjes: a ka marrë Mourinho nga United aq sa mundet?
“Mourinho ka dalë jashtë ideve dhe arsyetimeve, nuk ka më mbështetjen e shumicës së lojtarëve të tij. Krahasoni punën që ai ka bërë te United me Pep Guardiola dhe Jurgen Klopp në Manchester City dhe Liverpool në të njëjtën periudhë, ose edhe përmirësimet afatshkurtra të bëra nga Unai Emery dhe Maurizio Sarri te Arsenal e Chelsea dhe ndryshimi është i turpshëm. Kundër Liverpool dhe Cityt, në veçanti, United ka treguar të metat e saj më të mëdha. Diferenca është shumë e madhe dhe dhe Mourinho tani po pret vetëm që të shkarkohet”, tha Chris Wheeler.
“Mourinho në fakt bëri një punë të mirë në vitin e tij të parë në United. Ai i dha klubit stabilitet, i mori ata në Ligën e Kampionëve dhe krijoi sërish atë respektin për veten. Por United tani duhet të lëvizë përsëri përpara. Kjo nuk do të ndodhë për aq kohë sa Mourinho do të jetë në drejtimin e skuadrës dhe kjo duket prej kohësh”, tha Ian Ladyman. TIRANA TODAY
