Policia italiane ka zhvilluar një operacion masiv kundër Cosa Nostra-s, që ka çuar në arrestimin e 180 personave të dyshuar për përfshirje në organizatën mafioze.
Të arrestuarit akuzohen për organizatë kriminale, tentativë vrasjeje, zhvatje, trafik droge, krime kundër pronës dhe personit, si dhe aktivitete të paligjshme të lojërave të fatit. Hetimet janë përqendruar në Palermo dhe në disa rrethe të tjera mafioze si Santa Maria di Gesù, Porta Nuova, San Lorenzo, Bagheria, Terrasini, Pagliarelli dhe Carini.
Sipas autoriteteve, pavarësisht arrestimeve të mëparshme, bosët e burgosur kanë vijuar të koordinojnë aktivitetet kriminale, duke përdorur kartela SIM të fshehura dhe celularë të koduar të kontrabanduar në qelitë e tyre.
Një nga të arrestuarit, Nunzio Serio, u përpoq të arratisej drejt veriut të Italisë pasi zbuloi një GPS të vendosur në makinën e gruas së tij, duke e kuptuar se po përgjohej. “Të gjithë jemi duke u bombarduar”, ishte shprehja që përdori ai, duke e ilustruar qartë presionin e operacionit ndaj mafies.
Ky hetim shënon një tjetër goditje të rëndësishme ndaj strukturave të Cosa Nostra-s, duke penguar përpjekjet e tyre për të rikthyer fuqinë kriminale në Palermo.
