Dy vëllezër nga Kruja janë arrestuar nga policia, pasi njëri prej tyre ishte dënuar për vjedhje me armë në një karburant katër vite më parë, ndërsa të dyshuarit janë përfshirë në një incident tjetër në prill të 2024-ës, ku kanë goditur fizikisht një person dhe kanë qëlluar me armë zjarri në ajër.
Operacioni policor i koduar “Brothers” u zhvillua nga Komisariati i Policisë Krujë, në bashkëpunim me Forcën e Posaçme “Shqiponja”, pas hetimeve dhe mbledhjes së inteligjencës informative. Gjatë këtij operacioni u arrestuan dy vëllezërit, përkatësisht 21 dhe 27 vjeç, të dy banues në Krujë.
Njëri prej tyre ishte dënuar me 3 vite e 4 muaj burgim nga Gjykata e Apelit për vjedhje me armë në bashkëpunim dhe për mbajtje të paautorizuar të armëve. Ngjarja kishte ndodhur në vitin 2021 në një karburant në fshatin Arramerras.
Në një tjetër incident të ndodhur më 7 prill 2024, dy vëllezërit dyshohet se kanë goditur me grushte një shtetas për motive të dobëta dhe kanë qëlluar me armë zjarri në ajër. Materialet hetimore janë referuar Prokurorisë pranë Gjykatës së Shkallës së Parë Tiranë për veprime të mëtejshme ligjore.
Njoftimi i Policisë:
Finalizohet operacioni policor i koduar “Brothers”, për kapjen e 2 shtetasve (vëllezërve) në kërkim për vepra të ndryshme penale.
Njëri prej tyre, i dënuar me 3 vjet e 4 muaj burgim, si bashkëpunëtor në vjedhjen me armë, të një shume parash, në një karburant, në fshatin Arramerras, në vitin 2021.
2 vëllezërit, në muajin prill 2024, dyshohet se kanë goditur me grushte një shtetas dhe më pas kanë qëlluar me armë zjarri, në ajër.
Komisariati i Policisë Krujë, në bashkëpunim me shërbimet e Forcës së Posaçme “Shqiponja”, bazuar në inteligjencën informative, ka organizuar dhe finalizuar operacionin e koduar “Brothers”, si rezultat i të cilit janë kapur dhe ndaluar shtetasit në kërkim: 21 vjeç dhe 27 vjeç (vëllezër), të dy banues në Krujë.
Shtetasin Gjykata e Apelit e ka dënuar me 3 vjet e 4 muaj burgim, për veprat penale “Vjedhja me armë”, e kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe municionit”, si bashkëpunëtor në vjedhjen me armë, të një shume parash, në një karburant, në fshatin Arramerras, në vitin 2021.
Gjithashtu, dyshohet se në bashkëpunim me vëllanë e tij, shtetasi më datë 07.04.2024, kanë goditur me grushte shtetasin dhe më pas kanë qëlluar me armë zjarri, në ajër, për motive të dobëta.
