Vizita në Korenë e Veriut për studentin amerikan Otto Warmbier nga Unversiteti i Virxhinias, rezultoi të ishte një udhëtim ‘vetëvrasjeje’.
Otto Warmbier u arrestua në Korenë e Veriut pasi atje vodhi një poster propagandistik, për të cilin u dënua me 15 vite punë të rënd në një kamp. Ai vdiq në qershor të vitit 2017, pak pasi e kthyen në SHBA në gjendje kome dhe me shenja të dukshme torture.
Prindërit e tij u zotuan se do kërkonin drejtësi. Kështu, një gjykatë federeale në Shtetet e Bashkuara të Amerikës ka urdhëruar Korenë e Veriut që të paguajë 500 milionë dollarë dëmshpërblim për vdekjen e studentit. Gjyqtarja Beryl Howell e distriktit të Uashingtonit tha se Koreja e Veriut duhet t’ia paguajë dëmet prindërve të Warmbier, Fred dhe Cindy. Sipas gjykatëses, vendi komunist është përgjegjës për torturimin, marrjen peng dhe vrasjen pa gjyq të 22-vjeçarit.
Ndërkohë, Koreja e Veriut i ka mohuar vazhdimisht akuzat për torturë, duke thënë se 22-vjeçari vdiq për shkak të një sëmundje të quajtur butulizëm. Vendimi është më shumë simbolik pasi nuk ka asnjë mënyrë praktike se si regjimi komunist të paguajë shumën e madhe.
Gjykatat mund të urdhërojnë sekuestrimin e pasurive të Koresë së Veriut në SHBA, por kjo është e pamundur pasi vendi komunist është nën sanksione, çka do thotë se nuk ka akses në sistemin financiar të SHBA-ve.
Marrëdhëniet mes Koresë së Veriut dhe SHBA njohën përmirësim para disa muajsh, por tashmë janë përkeqësuar pasi vendi komunist thotë se do të vazhdojë programin bërthamor.
