Gjykata e Posaçme e Shkallës së Parë ka urdhëruar Policinë e Shtetit që më datë 19 Maj, ora 11.00, të shoqërojë ish-kryeministrin Sali Berisha në sallën e gjyqit. Kështu ka deklaruar kryebashkiaku Erion Veliaj.
Ky vendim i Gjykatës së Posaçme vjen pa padisë së bërë nga Erion Veliaj, për deklaratat e përsëritura në media të Berishës, se kryebashkiaku i Tiranës ka qenë disa herë në Iran dhe është “i përlyer” me afera që kanë lidhje me Gardën Revolucionare.
Seanca e parë e gjyqit është mbajtur këtë të hënë dhe ka përfunduar vetëm pak minuta më parë. Kryebashkiaku Erion Veliaj është shprehur për mediat se Sali Berisha nuk ishte paraqitur në seancën e sotme, ndaj Gjykata e Posaçme ka urdhëruar policinë që të bëjë shoqërimin e tij.
Nëse Sali Berisha nuk paraqitet në gjyqin e radhës me Erion Veliaj, Policia e Shtetit duhet të ekzekutojë urdhrin e togave të zeza për ta shoqëruar me forcë ish-kryeministrin, më datë 19 Maj ora 11.00, në ambientet e Gjykatës së Posaçme.
Pritet se çfarë qëndrimi do të mbajë ish-kryeministri Sali Berisha. Nëse ky i fundit zgjedh të shkojë në gjykatë, aty trupa gjyqësore do të tentojë një seancë pajtimi mes palëve. Pra, nëse Veliaj dhe Berisha bien dakord për pajtim, atëherë palët do të pranojnë kushtet e njëra-tjetrës, për përgjënjeshtrim deklaratash apo kërkim falje publike.
Nga ana tjetër, nëse palët nuk bien dakord atëherë gjyqtari Erion Bani do të vazhdojë me procesin gjyqësor për shpifje, bërë nga Erion Veliaj, duke sekuestruar dokumentet shkresore dhe deklaratat e Sali Berishës.
