Seanca maratonë në Gjykatën e Posaçme për kryebashkiakun e Tiranës, Erion Veliaj, bashkëshorten e tij dhe pesë biznesmenët e përfshirë në aferën e dyshuar korruptive, ende nuk ka prodhuar një vendim përfundimtar. Gjatë seancës, e cila zgjati mbi gjashtë orë, Veliaj është përplasur ashpër me prokurorin Dado, ndërsa jashtë mbështetës të tij, përfshirë punonjës të Bashkisë, protestuan pranë SPAK-ut.
Kryeministri Rama, i cili fillimisht e quajti çështjen një “roman”, ka ndryshuar tonin, duke akuzuar Prokurorinë e Posaçme për veprime të motivuara politikisht. Ai paralajmëroi se ekzekutivi nuk do të heshtë ndaj asaj që e quajti një “Republikë Prokurorësh”.
Ndërkohë, anëtari i Kryesisë së PD-së, Belind Këlliçi, në një intervistë televizive, deklaroi se Veliaj do të përfundojë si ish-ministri Lefter Koka, duke shtuar se atij mund t’i shtohen akuza për inceneratorin e Tiranës dhe çështje të tjera që lidhen me abuzime në bashki.
“Mesa duket nuk e kam patur fatin deri tani. Kanë shërbyer për të çuar prapa hekurave pjesën dërrmuese të drejtorëve të Bashkisë Tiranë, bashkëpunëtorëve dhe kampionëve që krenohej dikur Veliaj, që rezultuan që ishin kampion të hajdutërisë.
Jam i bindur që Erion Veliaj do të ndjek fatin e Lefter Kokës. Thënë këtë, njësoj si Lefter Koka pasi u dënua për inceneratorin e Elbasanit, iu ngarkua dhe inceneratori i Fierit, iu ngarkua dhe ai i Tiranës dhe me siguri do i ngarkohet dhe ndonjë vepër penale Edi Ramës. Dhe Erion Veliajt të jeni e bindur që do ti ngarkohet inceneratori Tiranë, do ti ngarkohet “5D” dhe ndonjë hajdutëri tjetër Edi Ramës“, u shpreh Këlliçi.
