Milan Radojçiq, ish-nënkryetari i Listës Serbe dhe personi që ka pranuar se ka udhëhequr grupin terrorist në Banjskë ku mbeti i vrarë rreshteri i Policisë së Kosovës, Afrim Bunjaku, është liruar nga paraburgimi disa orësh në Beograd.
Ai u arrestua me bujë pasditen e djeshme, me urdhër të Prokurorisë së Lartë Publike në Beograd, për akuzat që lidhen me sulmin në veri të Kosovës.
Mirëpo, Radio Televizioni i Serbisë njofton këtë të mërkurë se gjyqtari i procedurës paraprake të Gjykatës së Lartë në Beograd refuzoi propozimin e organit të akuzës për caktimin e paraburgimit, duke i dhënë lirinë Milan Radojçiq.
Sipas njoftimit të gjykatës, një ndër njerëzve më të afërt të presidentit Vuçiç i është shqiptuar masa e ndalimit që të largohet nga territori i Republikës së Serbisë pa lejen e gjykatës dhe i është ndaluar të futet në territorin e Kosovës.
Gjithashtu, ai është urdhëruar të paraqitet në stacionin policor kompetent çdo datë 1 dhe datë 15 të muajit.
Milan Radojçiq i është konfiskuar përkohësisht edhe dokumenti i udhëtimit, përkatësisht pasaporta e Republikës së Serbisë dhe i është tërhequr vërejtja se mund t’i shqiptohet paraburgimi nëse i shkel të drejtat dhe detyrimet.
Prokuroria dyshon se ish-nënkryetari i Listës Serbe ka siguruar armë, municione dhe mjete shpërthyese me fuqi të madhe shkatërruese, nga Tuzlla e Bosnjës, që nga janari i vitit 2023 deri më 24 shtator. Armët e trafikuara janë dorëzuar në Beograd, ku më pas, Radoiçiç i ka transportuar në territorin e Kosovës dhe i ka fshehur në pyje dhe objekte të braktisura.
Kujtojmë se, pak ditë pas sulmit në Banjskë, Milan Radojçiq dha dorëheqjen si nënkryetar i partisë së Listës Serbe dhe pranoi se kishte drejtuar grupin e terroristëve në veri.
Në një letër, Milan Radojçiq shprehej se ai dhe serbët e tjerë shkruan në veri të Kosovës më 24 shtator me qëllimin për të inkurajuar popullin serb që t’i rezistonte “regjimit të Kurtit” dhe “të realizonin ëndrrën e lirisë së popullit serb”.
