nëse dosja “Partizani”, me të pandehur Sali Berishën, dhëndrin e tij Jamarbër Malltezi dhe tre të tjerët, do të kalojnë për gjykim. Një ditë më parë GJKKO rrëzoi kërkesat e avokatëve për pavlefshmëri të provave. A do ketë më zvarritje?
Sot në orën 13:00, GJKKO pritet të marrë vendimin përfundimtar nëse dosja “Partizani”, me të pandehur Sali Berishën, dhëndrin e tij Jamarbër Malltezi dhe tre të tjerët, do të kalojë për gjykim.
Vendimi pritej të shpallej në seancën paraprake të 23 Prillit, por gjyqtarja Fjorela Davidhi vendosi ta shtyjë për sot. Një ditë më parë, gjyqtarja rrëzoi kërkesat e avokatëve mbrojtës për pavlefshmëri dhe papërdorshmëri të provave të SPAK, por nuk dha vendim për kalimin e çështjes në gjykim.
Prej muajsh, mbrojtja ka përdorur mjete të ndryshme ligjore për të vonuar vendimmarrjen, në përpjekje për të shmangur përballjen e Berishës me gjykatën para zgjedhjeve parlamentare të 11 majit. Seanca paraprake nisi që në tetor 2024 por është shtyrë vazhdimisht deri më tani, kryesisht përmes taktikave të ndryshme nga mbrojtja. Nëse gjyqtarja Davidhi vendos kalimin e çështjes për gjykim, kjo do të ishte përballja e parë e Sali Berishës me drejtësinë. Vendimi do të ishte një goditje e fortë për të, dhe do të vinte vetëm pak javë para zgjedhjeve parlamentare të 11 majit.
Sali Berisha akuzohet për korrupsion pasiv, pasi dyshohet se ka përdorur postin e tij si kryeministër për të favorizuar dhëndrin e tij në privatizimin e ish-kompleksit sportiv “Partizani”. Sipas SPAK, ai ka miratuar vendime dhe akte ligjore për të lehtësuar procesin dhe ka ushtruar presion mbi institucionet shtetërore për ta përshpejtuar privatizimin. Jamarbër Malltezi, dhëndri i Berishës, është nën arrest shtëpie dhe akuzohet për korrupsion pasiv dhe pastrim parash. Ai dyshohet se ka përfituar 5.4 milionë euro nga privatizimi dhe ndërtimi i pallateve në truallin e ish-klubit Partizani.
Fatmir Bektashi, biznesmen dhe bashkëpunëtori në projekt, është i pandehur për korrupsion aktiv dhe pastrim parash. Xhimi Begeja, bashkëpronar i truallit dhe ortak në kompaninë “Homeplan”, akuzohet për pastrim parash. Andia Pustina, ish-financiere e kompanisë “Homeplan”, akuzohet gjithashtu për pastrim parash, pasi administroi veprimet financiare dhe ligjore të shoqërisë. Përveç tyre, SPAK ka vënë nën akuzë për pastrim parash edhe shoqëritë Homeplan sh.p.k., Studio Pustina sh.p.k. dhe Kontakt sh.p.k.
