Duvan Zapata është njeriu i momentit te skuadra e Atalantës. Forma e mirë e dhjetorit, ku shënoi tetë gola në gjashtë ndeshje të Serie A, vazhdon edhe në vitin 2019-ën. Kolumbiani ishte autori i një “pokeri” në transfertën ndaj Frozinones, që përfundoi me fitoren e thellë me shifra 5–0 për bergamaskët.
Në këtë takim ishin protagonistë dhe dy lojtarë shqiptarë. Portieri Etrit Berisha dhe mbrojtësi Berat Gjimshiti, e nisën nga minuta e parë.
“Gardiani” kuqezi e ka “betonuar” statusin si titullar dhe në sytë e trajnerit Gasperini, nuk ka më dyshime, në ndryshim nga fillimi i sezonit, kur e uli në stol për t’i dhënë mundësi të riut Golini. Gjimshiti zhvilloi gjithashtu një ndeshje të mirë, ku spikati me asistin e golit të tretë të Atalantës, madje duke shmangur bukur 3 kundërshtarë.
Asistin dhe driblimin fantastik te Gjimshitit mund ta ndiqni ne videon e mëposhtme ne sekondën 2:20.
Kontrata e qendërmbrojtësit shqiptar mbaron në fund të sezonit dhe po flitet gjithnjë e më shumë për një interes të Beshiktashit.
