Gazetarja dhe pedagogia Erenestina Halili është nderuar me çmimin për librin më të mirë poetik të vitit 2017. Çmimi iu dorëzua në panairin kombëtar të librit “Fieri 2017”, për vëllimin “Gjâma e erës”. Ky vëllim na çon pas në kohë duke na zbuluar gjurmët etnografike të një të folmeje, gati të harruar e duke na sjellë një ritëm dhe muzikalitet të brendshëm.
Gjithashtu, në këtë panair u ndanë edhe 4 çmime të tjera, për prurjet më të mira të vitit në disa gjini letrare, ku fitues u shpallën Vladimir Marku, Shkëlzen Zalli, Monika Stafa dhe Odise Plaku. Marku u shpërblye për romanin më të mirë, me motivacionin: Për romanin ‘Gladis’, i cili sjell një spektër të tërë ngjyrimesh emocionale dhe karaktere që nisin nga e veçanta për të prekur universalitetin.
Shkëlzen Zalli u nderua me çmimin për librin më të mirë për fëmijë, ndërsa Monika Stafa ka fituar çmimin për librin publicistikë/studimor më të mirë për librin “Kod”.
