Kreu i Grupit Parlamentar të PD është shprehur pas mbledhjes me deputetët demokratë, se gjuha përçarëse dhe ndasitë forcojnë Partinë Socialiste dhe nuk ndihmojnë në situatën aktuale në të cilën është kjo forcë politike.
Këto komente, Gazment Bardhi i bëri pasi u pyet nga gazetarët për bashkëpunimin me grupin tjetër që drejtohet nga Sali Berisha.
“Grupi Parlamentar i PD, në vijimësi, është e vetmja trupë brenda PD që në mënyrë koherente ka bërë thirrje për bashkim, mos-përçarje, mos-krijimin e ndasive. Ndasi që sjellin forcimin e PS”, u shpreh Bardhi pas mbledhjes me 15 deputetë të tjerë të PD.
“Ajo që unë gjykoj që është e rëndësishme për PD, është të ndalet gjuha përçarëse dhe ndasitë. Detyra jonë si përfaqësues të demokratëve është të ofrojmë zgjidhje, më pas secili bën zgjedhjen e tij. Të ndarë, të përçarë, nuk fuqizohet PD, por Edi Rama”, vijoi Bardhi.
Bardhi u pyet dhe për mundësinë e rikthimit të Lulzim Bashën në krye të Partisë Demokratike.
“Përsa i përket kandidimeve, rikandidimeve, kthimeve dhe rikthimeve, sa kohë nuk ka asnjë qëndrim në lidhje me këtë çështje, as nga institucionet e partisë, as nga individë të përveçëm, unë nuk mund të flas paradhënie. Ndoshta ua ka konfirmuar juve, por unë nuk e kam dëgjuar. Mua nuk ma ka rikonfirmuar, edhe në media nuk e kam dëgjuar”, u shpreh ai.
