Drejtuesi politik i PD në qarkun e Fierit, Gazment Bardhi akuzon ministren e Energjisë dhe Infrastrukturës, Belinda Balluku se ka abuzuar miliona euro me aferën korruptive të inceneratorëve.
Në një mesazh në fb, Bardhi thotë se i vetmi plan që qeveria e Edi Ramës ka patur për fshatin Plyk dhe Mbyet ishte shndërrimi në fushë mbetjesh për inceneratorin.
“Protestat e banorëve e zhbënë këtë plan, edhe pse nuk ndalën dot projektin korruptiv të incineratorëve, që s’është vënë në punë asnjë ditë. Belinda Balluku do të duhet të mbajë përgjegjësi edhe për këtë, por kjo është një histori tjetër.
Sot, fshati Plyk dhe Mbyet janë në emergjencë mbijetese. Me kandidatin Gentian Koçi takuam njerëz të lënë në harresë, të pashpresë dhe të zhgënjyer.
Njerëzit duan punë, por qeveria është e zënë me vjedhjen e radhës. Fermerët kërkojnë mbështetje, por kandidatët e Belindës hyjnë e dalin në SPAK, që ka zbuluar abuzime me qindra milionë euro në Ministrinë e drejtuar nga Belinda Balluku”, shkruan drejtuesi i PD në qarkun e Fierit, Gazment Bardhi.
