Kreu i grupit parlamentar të Partisë Demokratike, Gazment Bardhi, ka reaguar ashpër ndaj vendimit të Presidentit Bajram Begaj, i cili përmes një shkrese drejtuar Gjykatës Kushtetuese, kërkoi të caktohen datat për të gjitha mandatet sa i takon procesit të përtëritjes së anëtarëve.
Bardhi e ka cilësuar si një akt të papranueshëm dhe të dënueshëm. Sipas Bardhit, Begaj po vepron në interes të Kryeministrit Edi Rama për të marrë kontrollin e plotë të Gjykatës Kushtetuese.
“Ky është një akt i pashembullt për të kapur 100% Gjykatën Kushtetuese. Kushtetuta qartësisht garanton një mandat të plotë 9-vjeçar për gjyqtarët në detyrë, dhe çdo cënim i tij minon pavarësinë e gjykatës dhe shtetin e së drejtës,” deklaroi Bardhi.
Ai akuzoi Presidentin Begaj për zbatimin e një skenari politik të dirigjuar nga mazhoranca dhe tha se ky veprim rrezikon të delegjitimojë të gjithë institucionin e Gjykatës Kushtetuese. “Begaj nuk ka surprizuar askënd si ushtar i bindur i Ramës, por guximi i tij për të shkatërruar Kushtetutën është përtej çdo pritshmërie,” shtoi ai.
Në përfundim, Bardhi kërkoi ndalimin e menjëhershëm të këtij procesi, duke paralajmëruar se ai vë në rrezik legjitimitetin e Gjykatës Kushtetuese dhe pavarësinë e sistemit të drejtësisë.
Reagimi i plotë:
Akti i pashëmbullt i Bajram Begajt, në emër dhe për llogari të Edi Ramës, për të kapur 100 % Gjykatën Kushtetuese, është jo vetëm i dënueshëm, por edhe i papranueshëm.
Kushtetuta qartësisht i ka dhënë gjyqtarëve në detyrë një mandat të plotë 9 vjeçarë, që nuk mund të cenohet në asnjë rrethanë pas fillimit të detyrës. Cënimi i mandateve nënkupton cenimin e vetë pavarësisë së Gjykatës dhe parimeve themelore të shtetit të së drejtës.
Me aktin e sotëm Bajram Begaj nuk ka surprizuar askënd për rolin e tij si ushtar i bindur i Edi Ramës, por guximi i tij për të shkuar deri tek hedhja në erë e Kushtetutës vetëm që Edi Rama ta rrëmbejë Gjykatën Kushtetuese 100 %, është përtej pritshmërisë së shërbimeve edhe nga ushtari me gradën më të ulët.
Duke dënuar me forcë aktin e sotëm të Bajram Begajt, apeloj që kjo lojë që rrezikon legjitimitetin e vetë Gjykatës Kushtetuese, të ndalet menjëherë.
