Gazeta e njohur greke “gazetta.gr”, i ka kushtuar një shkrim drejtuesve italianë që kanë marrë në dorë Partizanin dhe ecurinë e dobët që ka pasur ekipi deri më tani. Po ashtu edhe objektivat e mëdha që kanë vendosur këta drejtues.“Roli i Bebetos dhe Luçiano Moxhit te Partizani në Tiranë”-titullohet shkrimi i “gazetta.gr”.
Gazeta greke vijon duke u shprehur se “Bebeto i madh, Luçiano Moxhi dhe ish-Juventini, Mark Luliano, janë në Shqipëri për të ngritur Partizanin. I njohur për përfshirjen në skandalin Calciopoli, Luçiano Moxhi, tashmë punon te Partizani në Tiranë, si këshilltar i drejtpërdrejtë i Presidentit Gaz Demi”-shkruan sajti grek.
Më tej, “gazetta.gr”, citon fjalët e Luçiano Moxhit, duke vënë theksin: “Qëllimi im është që skuadra të luajë në kupat Evropiane apo dhe në Ligën e Kampionëve, për ta bërë këtë, duhet të kalojmë nëpër kualifikuese dhe shpresoj ta bëjmë”-shkruan sajti grek, duke vënë theksin tek qëllimet e Luçiano Moxhit, si këshilltar i Presidentit të “demave”.
Ndërsa për Bebeton, “gazetta.gr” shkruan se ai është mik me Presidentin e të “kuqve” dhe qëllimi i tij është të ndihmojë Partizanin të ndërtojë një akademi futbolli. “Unë do të kem rolin e këshilltarit të presidentit, është një zotëri i cili ka një vizion të shkëlqyer për futbollin, kemi diskutuar gjithçka kur ai erdhi në Brazil.
Nuk ka kuptim të ndërtojmë një grup tani nëse nuk keni bazë për të ardhmen. Edhe kur isha duke luajtur te Flamengo unë i kisha thënë të njëjtën gjë presidentit të saj “-citon gazeta greke, nga fjala e Bebetos, mbajtur gjatë konferencës për shtyp kur ai erdhi në Shqipëri pak javë më parë.
Në fund “gazzetta.gr”, e mbyll me një përshkrim të shkurtër të ecurisë së Partizanit në kampionatin shqiptar, ku vë theksin tek rezultatet e dobëta në katër javët e para të Superligës shqiptare.
