Manchester United e ka nisur me këmbën e mbarë aventurën me trajnerin e ri, Ole Gunnar Solskjaer. Si një legjendë e ‘Djajve të Kuq’ edhe Solskajer e ‘urren’ Liverpoolin dhe tifozët e tij. Këtë e ka vërtetuar një gazetar irlandez i cili flet për takimin e tij me trajnerin e United.
JJD Devaney ishte duke raportuar mbi ndeshjen e kualifikueseve të Champions League të Sligo Rovers ndaj Molde-s së Solskjaer në vitin 2013, një ndeshje që është fituar 1-0 nga norvegjezët.
Pas ndeshjes, Devaney ishte në konferencën e shtypit dhe i është afruar Solskjaer-it për t’i dhënë dorën teksa trajneri i Molde-s u çua nga karrigia.
“Shkova për ta përshëndetur,” shprehet gazetari për Caught Offside. “I zgjata dorën dhe i thashë, ‘Ole, është një kënaqësi që po të takoj’. Ai më pa me ato sytë blu. Më pas i thashë, ‘Dëgjo, ke qenë një lojtar i mrekullueshëm, dhe megjithëse jam një tifoz i Liverpool, doja të të përshëndesja’.
“Ai nuk lëvizi asnjë muskul të fytyrës. Ai më nguli sytë dhe më tha: ‘Po ta dija se ishte një tifoz i Liverpool, nuk do ta kisha dhënë dorën.”
