Rino Gattuso është prezantuar ditën e sotme si trajneri i ri i Milanit, pas shkarkimit nga posti i Vincenzo Montella-s. 39-vjeçari ka qenë prezent ditën e sotme në Milanelo dhe fjalët e tij të para si numri një i pankinës kuqezi ishin: “Është një ditë e rëndësishme. Ka përgjegjësi e madhe. Është një skuadër me 16 lojtarë që luajnë me kombëtaret dhe mosha mesatare është 21-vjeç. Mund të bëjë më shumë se kaq, kjo është e sigurt. Unë kam më shumë se 100 ndeshje si trajner në kampionate të ndryshme. Duket sikur kam stërvitur debutues… Kam metodat e mia, do të punojmë me mbrojtjen me 3. Montella e pëlqen shumë lojën me top, edhe mua më pëlqen, por unë dua të vertikalizoj dhe të arrij te gjuajtjet më shpejt”.
Duket se ambientet ku ka punuar më parë Gattuso nuk i afrohen aspak ato që do të punojë tani që ka drejtimin e Milanit dhe për këtë fakt italiani është shprehur mjaft i kënaqur. Po ashtu është shprehur i bindur se nuk do të ketë nevojë për ndërhyrje në merkaton e janarit, pasi lojtarët që ka në dispozicion kanë akoma shumë për të dhënë.
“Kur shoh fushat e stërvitjes këtu më ikën truri, kemi gjithçka duhet. Isha mësuar me gjëra krejtësisht të tjera. Korrektësi me rrogat, gjithçka e mrekullueshme. Ka vetëm nevojë për pasion dhe për dashuri kjo punë. Karakteristika që unë mendoj se i kam”. Blerjet e reja? Kjo skuadër mund të bëjë akoma më shumë, lojtarët kanë cilësi të madhe. Tani është koha të bëhemi një skuadër, të zbresim në fushë si skuadër. Na duhet shpirt luftarak, po cilësia është.”
Milani është një ekip që ka një histori mjaft të madhe në Itali dhe në arenën ndërkombëtare, por situata që ka përjetuar vitet e fundit nuk i shkon aspak përshtat këtij ekipi. Gatuso dëshiron të kthejë grindën në ekip dhe ta çojë Milanin atje ku duhet të jetë dhe për këtë gjë mendon se i ka idetë e qarta. Ajo që Gattuso bën si trajnerë është larg asaj që ishte si futbollist, një luftëtarë i vërtetë në fushë. Duke e njohur mjaft mirë kampionatin italian ai është i qartë që nuk ka ndeshje të lehta dhe duhet të vlerësojmë maksimalisht çdo ndeshje.
“Tani nuk e shoh klasifikimin. Duhet të mendojmë për Beneventon si një finale për Kupën e Botës. Duhet të ndryshojmë. Në San Siro topi është i rëndë. Dua t’i jap diçka më shumë në nivel psikologjik këtyre djemve. Nuk ia vlen të flasim për Rino Gattuson futbollist. Nuk mund të flasim vetëm për grintë dhe zemër. Kam kaluar nga Coverciano, nuk ma ka dhuruar kush licencën. Kam studiuar, ka udhëtuar. Ndeshjet nuk përgatiten vetëm me zemër dhe me grintë. Dua ta jetoj jetën time si protagonist. Shterpësia e golave? Historia ime tregon se skuadrat e mia pësojnë pak gola, por shënojnë shumë. Do të punojmë në këtë drejtim. Por problemi nuk është shënimi i golave”.
