Edhe 24 orë na ndajnë nga derbi më i zjarrtë i kontinentit, përballja mes Milanit dhe Interit. Gattuso në prag derbi është shfaqur i frikësuar dhe u shpreh se Interi është favorit për të fituar këtë sfidë.
Italiani ka folur para derbit lokal dhe botëror mes kuqezinjve dhe zikaltëve, i cili do të zhvillohet ditën e nesërme. “Ata mund të përballojnë humbjen, ne nuk mundemi. Kjo është si një finale. Si lojtar, isha më i qetë para derbit, por si trajner është më e vështirë,” tha Gattuso në konferencën për shtyp.
Kuqezinjtë janë të pamposhtur në 13 ndeshjet e fundit në Serie A, por triumfuan kundër Lazios pas ekzekutimit të penaltive në gjysmëfinales e Kupës së Italisë.
“Kam frikë nga Luciano Spalletti, i cili ka më shumë përvojë në derbi, si me Romën dhe Milan, kështu që ai di se si t’i trajtojë këto lojëra. Kam frikë nga Mauro Icardi, i cili është një nga sulmuesit më të mirë në botë dhe janë vetëm disa lojtarë që kanë lëvizje më të mira se ai. Ai kurrë nuk del huq para portës”, tha trajneri italian.
“Kam frikë se ndonjë mund të mendojë se jemi papritmas fantastikë, në realitet nuk duhet të harrojmë nga ku kemi filluar. Ende nuk kemi bërë asgjë dhe ende kemi nevojë të bëhemi një ekip. Ne kemi potencial për të bërë gjëra të mëdha, por nuk duhet të humbasim sakrificën dhe punën e vështirë”, pohoi Gattuso.
Milani renditet në vendin e shtatë me 44 pikë, ndërsa Interi ndodhet në vendin e 4 me shtatë pikë më shumë. Kjo diferencë pikësh dhe gara për një vend në Champions League, ia rrit më shumë emocionet kësaj supersfide.
