Gentian Selmani u transferua këtë sezon te skuadra e Ligës së Parë turke, Menemenspor. Por, aventura e ish-gardianit të Laçit, duket se nuk do të jetë e gjatë në këtë klub, pavarësisht se i mbetet edhe një vit kontratë.
Paraqitjet e portierit të kombëtares kanë qenë në një nivel pozitiv dhe në këtë formë drejt klubit turk për shqiptarin ka pasur interesime të shumta nga klube europiane. Për 22-vjeçarin është përfolur një kalim drejt Serie A dhe sipas mediave turke, Bologna është e gatshme ta mirëpresë.
Por, jo vetëm nga Italia. Për Selmanin ka interes edhe nga gjigandët e futbollit grek, Olympiakos, ashtu si Spartak Moska dhe Krasnodar në Rusi e si Zorya në Ukrainë. Kaq shumë opsione për portierin e talentuar, i cili duket se këtë verë do të ndryshojë skuadër por i duhet të bëjë mirë llogaritë në zgjedhje për të bërë hapin e duhur e për të qëndruar në nivele të larta. Ndërkohë, në këtë situatë do të përfitojë edhe klubi i Menemenspor që e sheh Selmanin si lojtarin më të vlefshëm të ekipit.
