Pas Evangjelia Velit, radhën për t’u ngjitur në pedanë nga kuqezinjtë në Europianin e shtangës që po mbahet në Moskë e ka Briken Calja. Shtërmenasi është edhe sportisti me pritshmëritë më të larta të kombëtares shqiptare në këtë aktivitet.
Calja vitet e fundit ka qenë një garanci për medalje ari në Kampionatin Europian dhe do të kërkojë të përsëritet edhe këtë edicion. 31-vjeçari do të garojë sot në orën 19:00, në kategorinë 73 kg, ndërsa duket më i karikuar se kurrë. Me anë të një postimi në profilin e tij në “Facebook”, Calja premton se do të japë gjithçka për ta nderuar flamurin kombëtar.
Ja çfarë shkruan ai në rrjetet sociale:
“Ju ftoj të gjithëve të më mbështesni në Kampionatin Europian që po zhvillohet në Rusi. Mbështetja juaj më jep forcë dhe shtysë për ta çuar shtangën lart. Jam krenar që hyj në këtë garë me petkun e kampionit të Europës dhe do të jap gjithçka nga vetja që të zhvilloj një garë dinjitoze dhe të bëj krenar ato zemra shqiptarësh të cilët e duan sportin dhe vendin e tyre. Një garë e fortë më pret dhe shpresoj në një rezultat të mirë nga i cili do të ishim të gjithë krenarë. Nesër (sot) nuk do të jem unë në atë pedanë, por do jenë miliona zemra shqiptarësh të gatshëm për të bërë Evropën të dridhet sërish. Me besimin dhe mbështetjen tuaj do të hyj me kokën lart për një garë sa më dinjitoze. Shihemi në orën 19:00 ‘live’ në ‘RTSH Sport’ dhe ‘Eurosport1’”, shkruan Calja.
/panoramasport/
