Një garë e ethshme u zhvillua mbrëmjen e djeshme në dy televizionet kombëtare të vendit tonë, respektivisht në emisionet Top Story të Grida Dumës dhe Opinion të Blendi Fevziut.
Por, gara nuk ishte si zakonisht për audiencën e përgjithshme. Kjo garë ishte e fokusuar te vëmendja e vetëm një personi, Parashqevi Simakut, që tashme është kthyer në kryefjalë të mediave dhe portaleve shqiptare, për shkak se rastësisht u zbulua se flinte në rrugët e New Yorkut.
“Parashqevia po na ndjek tani live”, deklaroi e para Grida Duma. Më pas vijoi të bëjë një monolog për individualitetin e spikatur që Parashqevia ka treguar në jetë, për dimensionin e saj elitar, artistik dhe letrar, etj, etj, etj, etj…
Nuk vonoi dhe Blendi Fevziu, deklaroi se paralelisht me emisionin e Gridës, Parashqevia ishte ngulur para ekranit, për të parë edhe emisionin Opinion.
“Kjo është një foto në kohë reale që tregon Simakun duke ndjekur emisionin Opinion. Sapo ma sollën”, deklaroi Fevziu.
Në rastin e Fevziut, lajmërimi nuk përbën ndonjë çudi, pasi sigurisht dihet që emisionin Opinion e ndjekin në të gjithë kontinentet, por e veçanta e mbrëmjes së djeshme ishte se po e ndiqte pikërisht Parashqevi Simaku, të cilës ditët e fundit, i kanë mbushur mendjen se është një divë e madhe shqiptare, të cilën edhe ajo vetë e kishte harruar fare.
Parashqevi Simaku, po përjeton këto ditë emocione mjaft të forta. Nga një grua e pastrehë në punë të vet, tashmë e kanë vënë të pozojë duke ngrënë e kënduar nëpër restorante, por më kryesorja e kanë vënë para ekranit të përjetojë të njëjtat emocione që përjetojnë shumë shqiptarë kur shohin emisionet e mbrëmjes në vendin tonë. Ekziston rreziku që Parashqevia, pas natës së mbrëmshme të arratiset drejt Alaskës dhe këtë herë të mos ketë njeri në planet që ta gjejë më.
Më poshtë edhe ju të nderuar lexues mund të gjeni videot, ku lajmërohet nga dy moderatorët, se si Parashqevia ndjek nga New Yorku paralelisht dy emisionet e famshme.
