Mblidhet Komisioni i Pastërtisë së Figurës dhe Pasurisë për garën për drejtorin e ri të Byrosë Kombëtare të Hetimit,
Komisioni përbëhet nga dy prokurorët e SPAK Behar Dibra dhe Eneid Nakuçi, kryetarja e Apelit të GJKKO-së Saida Dollani dhe dy agjentë të BKH-së, pjesë e Komisionit.
7 kandidatët kanë paraqitur kësaj periudhe dokumentacionin e kërkuar dhe miratimin për t’iu ushtruar kontroll pasuror dhe të figurës për vete dhe rrethin familjarë të tyre. 7 kandidatët do të shortohen për tu përcaktuar relatori nga anëtarët e Komisionit i cili do të merret me secilin prej kandidatëve.
Ndërkohë nga ana tjetër, më datë 1 shtator, Këshilli i Lartë i Prokurorisë ka caktuar mbledhjen për të konstatuar përfundimin e mandatit të Aida Hajnajt që ka mbajtur për 5 vjet postin e drejtorit të BKH-së, dhe deri në përzgjedhjen e dërgimin e emrit që propozohet nga SPAK, BKH do të drejtohet nga zv.drejtori i kësaj Byroje, Joni Keta i cili është njëherësh kandidat për të marrë drejtimin.
Me interes pritet nëse KLP do ta votojë në bllok emrin që do të propozohet nga SPAK apo do ti ndajë votat për të pëlqyerin e Prokurorisë së Posaçme.
Kujtojmë se ky proces është shoqëruar me polemika e debate qoftë sa i takon emrave specifik të kandidatëve por edhe në lidhje me debatet mbi riemërimin në detyrë ose jo për një mandat të dytë të Aida Hajnaj.
