Votimi nëShqipërifilloi në orën 07:00 në të gjithë vendin dhe mbyllet në 19:00. Nga Komisioni Qendror i Zgjedhjeve thonë se disa orë para mbylljes së vendvotimeve ka pasur një ulje të pjesëmarrjes krahasuar me zgjedhjet e kaluara. Të drejtën e votës këtë vit e kanë 3,713,761 shtetas shqiptarë, përfshirë edhe për herë të parë diasporën.
Rënie e pjesëmarrjes në votime
Deri në orën 16:00 kanë votuar vetëm 36.27% e votuesve. Sipas raportimeve nga Komisioni Qendror i Zgjedhjeve (KQZ), kjo shifër tregon një rënie të pjesëmarrjes me rreth 5% krahasuar me të njëjtën orë gjatë zgjedhjeve të vitit 2021. Ndërkohë, qarku me pjesëmarrjen më të lartë është Tirana dhe Dibra, ndërsa Vlora regjistron pjesëmarrjen më të ulët.
Numri i përgjithshëm i votuesve në Shqipëri është rritur në këto zgjedhje, duke arritur në 3.71 milionë, nga 3.59 milionë që ishte katër vjet më parë. Pjesë e kësaj rritjeje është dhe diaspora, e cila për herë të parë ka mundësinë të votojë pas ndryshimeve në Kodin Zgjedhor.
Gara për 140 vende në Kuvend
Në zgjedhjet e vitit 2025, garën politike e përbëjnë 11 subjekte politike, 3 koalicione, me gjithsej 2046 kandidatë që synojnë një vend në Kuvendin e Shqipërisë. Për herë të parë, në asnjë qark të vendit nuk ka kandidatë të pavarur.
Të gjitha partitë vijojnë të bejnë thirrje për pjesëmarrje në votime, duke e konsideruar këtë një moment të rëndësishëm për të ardhmen e vendit. Partia Socialiste, e udhëhequr nga Edi Rama, synon të sigurojë një mandat të katërt radhazi, duke premtuar “pasaportën europiane”, me anëtarësimin e vendit në Bashkimin Europian deri ne vitin 2030.
Në anën tjetër, Partia Demokratike, e drejtuar nga Sali Berisha, së bashku me aleancën për “Shqipërinë madhështore” kërkon rikthimin në pushtet pas 12 vitesh në opozitë, duke premtuar “ndryshim të thellë në mënyrën e qeverisjes”.
Përveç partive tradicionale, këto zgjedhje shënuan një rritje të dukshme të partive të reja, që kërkojnë ndryshimin e peizazhit politik në vend. Partitë e reja që kanë hyrë në garë janë “Shqipëria Bëhet”, “Lëvizja Bashkë”, “Thurje” dhe “Mundësia”, të cilat janë shprehur të ofrojnë alternativa të reja në reformimin e vendit.
Zgjedhje nën vëzhgim dhe paralajmërim
Këto zgjedhje parlamentare janë të parat pas hapjes së negociatave për anëtarësimin e Shqipërisë në Bashkimin Europian në korrik të vitit 2022, dhe konsiderohen një test i rëndësishëm për të ardhmen e vendit. Rreth 50,000 vëzhgues, ku bëjnë pjesë ata nga partitë politike, shoqatat dhe organizatat e shoqërisë civile, si dhe vëzhgues ndërkombëtarë, përfshire misionin e OSBE-ODIHR, janë angazhuar për të monitoruar procesin zgjedhor dhe për të vlerësuar standardet demokratike dhe transparencën e tij.
Nga Durrësi, ku monitorioi nga afër procesin e votimit, ambasadori i BE-së në Shqipëri, Silvio Gonzato, theksoi rëndësinë e integritetit në procesin zgjedhor. “Janë zgjedhjet e para pas hapjes së negociatave dhe përveç Tiranës donim të vëzhgonim edhe në qytete të tjera se si po ecën ky proces”, u shpreh Gonzato për mediat.
Deri tani votimi ka vijuar pa incidente të mëdha, megjithatë 5 persona janë arrestuar per fotografim te votes. Kreu i KQZ, Ilirian Celibashi, u shpreh për mediat se kushdo që shkel ligjin do të vihet para përgjegjësisë.
“Minimumi i dënimit është 3 vite dhe ky është një mesazh i qartë për të gjithë, është e rëndësishme që jo vetëm politikanët, por edhe votuesit të kuptojnë se kanë përgjegjësi në raport me procesin zgjedhor”, tha Celibashi.
Nga rënia e komunizmit në 1991 e deri më sot, vendi ka kaluar 11 palë zgjedhje pluraliste. Por sfida ka mbetur e njejtë: të kthejë votën në një akt shprese, jo thjesht një detyrim qytetar./dw
