Ditën e sotme mbahen zgjedhjet për drejtuesin e ri të Federatës Shqiptare të Futbollit, garë kjo ku kandidojnë Bashkim Fino, Armand Duka dhe Shpëtim Hala.
Pak para fillimit të Asamblesë, forca të shumta policie kanë rrethuar ambientin e “Hotel Adriatik”, ku zhvillohen zgjedhjet, ndërsa vendi duket si një shtetrrethim i vërtetë.
Ndërkohë, pak para se të nisë Asambleja Zgjedhore, presidenti Armand Duka është parë teksa konsumon kafen e mëngjesit me presidentin e Kukësit, Safet Gjicin.
Pas largimit të Dukës, në tavolinën e Gjicit mbërrin administratori i Flamurtarit, Sinan Idrizi.
“Nuk firmosja pa ardhur ti”, ishte batuta e vlonjatit, drejtuar Gjicit.
Kandidati Bashkim Fino ka mbërritur rreth orës 08:35 dhe është takuar së pari me Koço Kokëdhimën, i shoqëruar nga kryetari i Bashkisë së Lushnjes, Fatos Tushe.
