Edhe njëherë, kryeministri Haradinaj ka bërë një gafë ndërsa po fliste për çështje ku ka prani të aspekteve fetare e gjithashtu të terminologjisë fetare.
Në fjalën e tij gjatë konferencës “Akaba Meeting”, ose e njohur si “ekstremizëm i dhunshëm”, shefi i qeverisë kosovare artikuloi dhe këtë frazë: “Ata nuk janë islamikë, por terroristë”.
Qëllimi ishte ndarja mes atyre që janë besimtarë , në kuptimin klasik të fjalës, pra njerëz të virtytshëm e të dobishëm, me ata të cilët kryejnë akte terrori, qartazi referuar bashkësisë myslimane. Dhe do mjaftonte të thoshte që “ata nuk janë myslimanë, por terroristë”, për ta përcjellë qartë, pastër e krejt logjikshëm, në pikëpamje gjuhësore, shoqërore, e mbi të gjitha fetare mesazhin e tij të ndarjes së të mirës nga e keqja, të vërtetës nga spekulimi; sepse në tre pikëpamjet nuk mund të ketë përputhshmëri mes një myslimani e një terroristi, referuar rrënjëve etimologjike të dy përcaktorëve.
Ndërsa me frazën “ata nuk janë islamikë, terroristë”, Haradinaj e ka bërë lëmsh mesazhin e tij, duke e shndërruar paradoksalisht në kundërthënës. Kjo sepse termi “islamist”, është një sajesë narratives orientaliste të Perëndimit për ta futur një mysliman në kallëpe ideologjike, e po ashtu besimin e tij. Në terminologjinë islame, termi “islamist” nuk ekziston. Ekziston vetëm përcaktori “mysliman”, për besimtarin që i përket Islamit si fe. Kësisoj, “islamist” ka marrë një konotacion ideologjik, siç dhe është synuar, prej së cilit rrjedh radikalizmi, ekstremizmi e gjithashtu terrorizmi. Kështu që fraza e Haradinajt ka qenë një nonsens disapërmasor.
Në konferencë një ditë më parë ishte edhe Princi jordanez, ku tha se përpjekjet për të gjetur një zgjidhje nga jashtë për luftërat fetare nuk janë të suksesshme.
“Është sfidë ideologjike. Terrorizmi islamik është brenda për brenda islamit. Nuk mund të zgjidhet duke aplikuar apo duke dhënë zgjidhje nga jashtë islamit”, u shpreh Princi i Jordanisë.
Kryeministri shqiptar Edi Rama ju referua bashkëjetesës fetare dhe ndërkufitare për t’i bërë një apel politikaneve për të përmirësuar marrëdhëniet me njëri-tjetrin.
“Është e vërtetë që ne kemi këtë trashëgimi të mrekullueshme. Është mbresëlënëse vëllazëria ndërkufitare ndërsa në anën tjetër shihet mungesa e vëllazërisë midis politikanëve”, tha Edi Rama.
Ndërkohë kreu i qeverisë Bullgare, Borisov, propozoi një zgjidhje për luftëtarët që kthehen nga konfliktet e armatosura të ISIS.
“Në Shqipëri të bëhet një qendër koordinimi për të gjithë luftëtarët që kthehen nga ISIS në territorin e Ballkanit”, u shpreh kryeministri bullgar Bojko Borisov. TIRANA TODAY
