Policia e Tiranës ka vënë në pranga dy persona që furnizonin grupe kriminale, me armë zjarri, të cilat modifikoheshin me silenciatorë.
Në kuadër të operacionit të koduar “Silent” u vunë në pranga teksa lëviznin me automjet në aksin rrugor “Qafë Kashar-Rinas”, shtetasit Arbër Hasa 19 vjeç dhe Joldi Peca 20 vjeç, të dy banues në Vorë.
Atyre iu gjetën 4 armë zjarri pistoleta, të cilat nga hetimet dyshohet se do t’iu shiteshin grupeve kriminale, pas modifikimit me silenciatorë. Në momentin e arrestimit, në automjet u gjet dhe 1 mjet prerës (thikë).
Në vijim të operacionit, u krye kontroll në banesën e shokut të të arrestuarve, shtetasit G. Sh., 49 vjeç. Në këtë ambient u gjetën 1 dorezë metalike dhe 1 shkop gome. Për posedim të kundërligjshëm të këtyre sendeve, nisi procedimi në gjendje të lirë për këtë shtetas, për veprën penale “Prodhimi, mbajtja, blerja apo shitja pa leje e armëve të ftohta”.
