Administrata Trump është duke përgatitur një strategji të re për një sistem hapësinor të mbrojtjes nga raketat. Zhvillimet e kohëve të fundit, kërcënimet ekzistuese nga Koreja e Veriut dhe Irani, por edhe sistemet e reja të armëve që po zhvillohen nga Rusia dhe Kina, të gjitha së bashku, kanë vënë në lëvizje Pentagonin të gjejë një zgjidhje për të ndërtuar një sistem mbrojtës sa më efikas.
Zyrtarë të lartë të administratës informuan gazetarët duke argumentuar se situata e krijuar kërkon “investime në konceptin e ri të strategjisë së mbrojtjes”. Përdorimi i teknologjisë hapësinore për mbrojtjen nga raketat, sipas tyre është “shumë i rëndësishëm për kapacitetet e një niveli të ardhshëm” që do të ndihmojnë Shtetet e Bashkuara “të qëndrojnë një hap përpara rrezikut”.
Që nga shqyrtimi i vitit 2010, zyrtarët thanë se SHBA-ja ka parë “një ndryshim të rëndësishëm në mjedisin e kërcënimit … Kundërshtarët tanë të mundshëm janë duke zhvilluar me shpejtësi një gamë shumë të zgjeruar të raketave të reja ofensive (sulmuese) “. Disa prej këtyre raketave, thonë zyrtarët, janë “të afta të kërcënojnë Shtetet e Bashkuara, por edhe aleatët e partnerët tanë”.
Kështu, një zyrtar i lartë i administratës njoftoi mediat të mërkurën (16 janar 2019) se SHBA-të janë duke u investuar që të instalojnë në hapësirë një sistem të avancuar sensorësh me qëllim për të zbuluar raketat armike qysh në momentin kur ato nisen. SHBA e sheh hapësirën si një zonë kritike për kapacitetet e gjeneratës së ardhshme, për të qenë gati përpara çdo kërcënimi, tha zyrtari, i cili gjithsesi foli në kushte anonimiteti.
Sa duket lajmet për armët e reja të Rusisë së Vladimir Putin, sistemet e silurëve nënujorë bërthamorë që mund të shkaktojnë cuname shfarosëse në brigjet e Shteteve të Bashkuara apo edhe të ndonjë aleati të tyre, kanë frikësuar administratën e Trump duke e detyruar që të kundërpërgjigjet të paktën me një sistem të aftë parandalimi. Një sistem që do të montohet në hapësirë, aty ku amerikanët kanë edhe supermaci të pamohueshme.
TIRANA TODAY
